Shillong, Naitung 23
U President ka Voice of the People Party (VPP), Bah Ardent Miller Basaïawmoit u la pyntip paidbah ba u la sam ïa ki skhim bad jingïarap na ka skhim MLA kaba long T.2.50 klur na ka Special Rural Works Programme (SRWP) bad T.3 lak na ka Intensive Sports and Youth Development Programme (ISYDP) jong u snem 2023-2024.
Haba kren ha ka jingïalang pyntip paidbah ïa ki kam kiba u la sam bad bynta sha ki nongshong shnong ka Nongkrem Constituency ha ka 23 tarik u Naitung 2024 ha ka ïingsah jong u kaba don ha Kynton u Mon, Laitkor, u Bah Ardent u la ong ba ka T. 10 lak kaba ka sorkar ka la mang sha ki MLA kum ka Discretionary Grant kaba dei ka skhim kaba ka sorkar ka la ai ïa ki MLA ban ïarap ïa ki paidbah haba pang ba shitom bad haba don kano-kano ka jingeh kaba kyrkieh. Na liang ka seng VPP ka khlem pyndonkam bakla ïa ka hynrei ka la pyndonkam hok bad ka jingbym pynbna paidbah ïa kata ka pisa ka dei namar ba T.10 lak shisnem kam long kaba ïahap ban ïathuh khana sarong ïa ki paidbah ba kum ki MLA ki ïoh T. 10 lak shisnem ban ai bai dawai. Hato kata ka T. 10 lak shisnem ka dap mo ïa baroh ki paidbah jong ka konstitwensi?
“Namar phi la ïohi ha kine ki sngi ki don kita ki MLA kiba la kren kumba ki theh lut sha u paidbah, ki da ïathuh khana shuh ïathuh khana ïa kata ka T. 10 lak hynrei balei pat kim pynshai ïa ka T. 250 lak. Ha kano ka rukom la sam ïa kane ka T.250 lak?”, la ong u Bah Ardent.
“Hato ka long mo ïa ngi ba ngin ïathuh khana sarong ïa ki paidbah ba ngi ïoh T.10 lak shisnem ban ai bai dawai? Hato dap T. 10 lak shisnem ïa u paidbah ha ka konstitwensi ban pyndap? Bad ngim sngew hi ruh ba ka dei ïa ngi ba ngin thad rong ïa u paidbah ban ïarap kum ha kata ka khep lyngba ka Discretionary Grant hynrei tang kawei ngim ju bam wat tang T. 1 ruh na kata ka Discretionary Grant”,
Shuh shuh u Bah Ardent u la ong na naduh shwa ka ilekshon MLA u la ïai ban jur ha ki jingïalang ïalap ilekshon paidbah ba ka ïing jong u MLA kam dei ka ïing ban pynïeng laiñ ban pan bai dawai ne bai kot bai sla hynrei ka jingkwah jong ka VPP ka long ba ka sorkar ka dei ban pynbiang ïa ki jaka sumar bad ki jingdonkam jong ki paidbah.
U la ong ba kum u nongmihkhmat uba ïoh ïa ka T.10 lak um lah ban pynbiang bad ai lut ïa katei ka pisa sha baroh ki paidbah ka konstitwensi hynrei la hap ban peit bad bishar ha ki khep ki khep kiba donkam shisha ïa katei ka lad jingïarap kaba donkam.
“Ngim lah ban pynbiang lut namar kata ngi sngew sheptieng ba ngin pynbna ba ngi don ïa kata ka T.10 lak hynrei ngi ai haba ngi tip ïa kiba dei hok shisha ban ai hynrei lada ngi pynbna ba ka don kata ka T. 10 lak, nga tharai u nongïeng laiñ ban ap bai dawai u bym dei hok ruh un wan ïeng laiñ hangne”, la ong u Bah Ardent.
“Balei phi ïathuh khana tang ïa ka T.10 lak? Balei phim ïathuh khana kumno phi sam ïa ka T.250 lak lem bad kiwei ki skhim kiba ai ka sorkar?”, la buh jingkylli u Bah Ardent.
U la ong ba ka jingïoh jong ki nongmihkhmat ïa katei ka T.10 lak ka pynduh thiah pynduh dem ïa ki nongïalam ka VPP namar ka long kaba eh ban pyndap lut ïa baroh ki paidbah ka konstitwensi hynrei kum ki nongïalam ki kwah ba ka sorkar ka dei ban pynbiang ïa ki jaka ai jingsumar bad lada kum ki nongmihkhmat ïa katei ka pisa ruh kin kham suk ka mynsiem shikatdei eh.
“Lada ngim ïoh ïa kane ngin kham suk ka mynsiem namar haba don ba wan pan pisa, ngi ïoh ban ai hynrei lada ka lah lut ngim don shuh ban ai, te kumno kein ngin kren sarong bad kumno ngin thad ïa kita ki paidbah bapli kiba wan haïing jong ngi ban wan pan bai dawai ba ngin ïathuh ba ngi sam bai dawai mangi”, la bynrap u Bah Ardent.
U la ong ba u kwah ban pynshai sha baroh ki paidbah ka jylla ba ki MLA jong ka VPP kim pynshlur ïa ki paidbah ban wan pan bai dawai ne bai kot bai sla na ïing jong u MLA namar ki kwah ban pyntreikam hok ïa ka MLA skhim bad kata ka T.10 lak kaba ka sorkar ka la mang kam pat biang ïa ki MLA ka VPP ban ïathuh khana sarong ba ki lah ban pynbiang bai dawai ïa ki paidbah hapoh ka konstitwensi.
Hapoh ka SRWP scheme 2023-2024, utei u MLA ka Nongrem u la pyllait T. 45 lak na ka bynta ki 60 tylli ki longïing-longsem kiba hap hapoh u laiñ ka jingduk ne BPL ha kaba mar T. 75,000 sha kawei ka longïing, T. 25,000 na ka bynta ki 200 tylli ki longïing na ka bynta ban pynbha ïa ki ïing ki sem jong ki, T. 10,000 sha 500 ngut ki nongseng kam lajong bad ki nongkhaïi, T. 20 lak na ka bynta ka Pomlakrai Presbyterian Secondary School, Pomlakrai Mawtharia, T. 12.50 lak na ka bynta ka Lumkynsai Presbyterian L.P & UP School Smit, T. 15 lak na ka bynta ka Nongkrem Presbyterian Secondary School Nongkrem Mawpynthaw, T.10 lak na ka bynta ka St John Bosco, Laitkor Mawrie, T. 10 lak na ka bynta ka HL Mizo LP School, Madanrting, Them Basuk, T. 2.50 lak na ka bynta ban pynbha ïa ka madan phutbol jong ka Laitkor, T. 15 lak (bynta banyngkong) na ka bynta ka madan phutbol Mawpynthaw bad T. 50 lak na ka bynta ka Reach Shillong Ministries School.
Katba na ka ISYDP scheme pat jong u snem 2023-2024, utei u MLA u la pyllait mar T. 50,000 sha ka Madanrting Sports Club, Pomlakrai Sports Club, Dongmusa Umphyrnai, Smit Sports Club, Umphrup Sports Club bad Nongkrem Sports Club.
