Shillong, Naitung 23
U President ka Voice of the People Party (VPP), Bah Ardent M. Basaïawmoit ha ka Sngi Ba-ar u la ban jur halor ka jingdonkam jong ka jingïatylli hapdeng ki paid ‘riewlum ka thaiñ Shatei Lam Mihngi ban ïada kyrpang ïa ka jinglong tynrai jong ki trai-ri trai-muluk hapoh ka thaiñ.
“Ym tang sha Ri-lum Garo, hynrei ka don ka jingpynsngew na kiba bun ki nongïalam ka thaiñ Shatei Lam Mihngi halor ka nongrim jong ka VPP. Ka don ka jingkwah ïakynduh jong ki nongïalam na Tripura…ngi la ïakynduh ruh bad ki nongïalam ka ZPM,” la ong u Bah Basaïawmoit haba kren sha ki lad pathai khubor.
U la ïathuh ruh ba dang ha kine ki khyndiat sngi ba la dep, u General Secretary bad MP ka seng, Dr. Ricky A.J. Syngkon u la ïakynduh bad ki nongïalam trai-ri ha Assam namar ka jingsngewkhia jong ki paid ‘riewlum ka thaiñ Shatei Lam Mihngi halor ka jingdonkam ban ïeng kawei bad kito kiba don ïa ka nongrim kaba skhem ban ïada kyrpang ïa ka jinglong tynrai, ka jinglong kyrpang jong ki nongshong shnong kum ki trai- ri trai-muluk hapoh ka thaiñ.
Haba kylli, u President u la ong, “Haba nga don ha Delhi ban ïashim bynta ïa ka jingbam smai jong u MP jong ngi, nga la ïoh hi ban pynsngew ha ki para nongïalam…ki MP na kiwei ki Jylla ba ngi hap ban sngewthuh ba kum ki ‘riewlum kiba don ha ka thaiñ Shatei Lam Mihngi, ngin hap ban don ka jingïasngewthuh jingmut – ban ïeng namar ngin hap ïatyngkhuh beit bad ki aiñ ka Sorkar India kiba long pyrshah ïa ka rukom im ka rukom pyrkhat jong ngi ki trai-ri trai-muluk.”
U la ong ruh, “Ka VPP kumta kan pyrshang ban ïakynduh ïa ki nongïalam jong kiwei pat ki jaidbynriew ha ka thaiñ Shatei Lam Mihngi.”
Halor ka jingthmu ka seng ban rung sha Ri-lum Garo, u Bah Basaïawmnoit u la ong ba ka don ka jingthrang na ki ‘riew don burom, ki briew kiba kwah ïa ka lynti kaba beit kaba khuid ba ka VPP kan sdang ban rung shapoh Ri-lum Garo.
Haba kdew ba ki la don ruh kiba la pynsngew ïa ka jingangnud ban ïoh tiket na ka seng na bynta ka ilekshon shiteng samoi, utei u nongïalam u la ong ba ïa mynta ka seng kam pat kwah ban leh kyrkieh haba ïadei bad kane ka bynta.
“Ngi kwah ba kumba long ha Ri-lum Khasi, ki briew da ka jingsngewthuh ki kyrshan ïa ngi bad kam dei da ka jingshongshit. Ki briew ki sngewthuh ïa ka nongrim balei ngi seng ïa ka VPP, bad lada ngi hiar sha Ri-lum Garo, ngin hiar da kata ka lynti kaba ngi ngin pynsngewthuh bad pynshai.”
Haba kylli la ka seng ka don jingthmu ne em ban pynïeng kyrtong ha ka ilekshon sha ka GHADC, u President u la ong, “Ngim pat nud eh ban ong ïa ka GHADC ilekshon, hynrei ka shong ha ka por, lada ngi ïoh ïa ka por kaba kylluid khyndiat, lehse lada ka por ka shah ngi lah ban hiar sha Ri-lum Garo.”
Shuh shuh u la bynrap, “Ïa mynta hi, ka jingpyrkhat jong ngi ka long ba ngin pynleit jingmut ïa ka 2028 (ilekshon MLA), hynrei ngim lah ban tip kiei ki ban mih ha kine ki khyndiat sngi-bnai ban wan.”
