Shillong, Naitung 23
U President ka Voice of the People Party (VPP) Bah Ardent M. Basaïawmoit ha ka Sngi Ba-ar u la ong ba ki sengbhalang bapher-bapher ki la shah pynbiej ha ban da biang ha ka Sorkar MDA halor ka mat ba ïadei bad ka Inner Line Permit (ILP).
“Ngan ong aïu, ïalade shimet ngam phylla. Ngam phylla ba kane ka kyntien ka mih na u Myntri Rangbah ka Jylla, u Conrad K. Sangma namar nga kynmaw ïa kaei kaba u kren ha ka sngi ba u shimti kum u Myntri Rangbah ka Jylla. U ong, ‘Let us not talk about ILP’, kata ka dei ka kyntien kaba mih na u ha ka sngi ba u shimti kum u Myntri Rangbah,” la ong u Bah Basaïawmoit haba jubab halor ka jingong u Myntri Rangbah ba ym donkam ‘Work Permit’ hapoh ka Jylla.
U la ong ruh, “Kine ki briew kim kwah ïa kino-kino ki aiñ ki ban tehlakam (ngi ngim ong ki ban khang), hynrei ban tehlakam ïa ka jingrung kyrthep haduh ba ngi la shah knieh lut ki kam ki jam nadong-shadong. Kine kijuh ki briew ki bym kwah ban kren ïa ka ILP, hynrei kine kijuh ki briew kiba pynbiej.”
Haba kdew ba ki sengbhalang ki la shah pynbiej ha ka rukom ba dei ha ka Sorkar MDA, u President u la ong, “Ki la shah pynbiej ha ban da biang. Ka Sorkar MDA ka mynjur ïa ka rai na bynta ka ILP ym da ka jingthmu ban pyntreikam ïa ka ILP, hynrei ban law-met ïalade na ka mat halor ka ILP.”
Ha kajuh ka por, u la buh jingkylli ba balei ka Sorkar Jylla kam dawa na ka Sorkar India ban weng noh ïa ka hukum President (Presidential Order) kaba la pynmih ha ka sngi ba shong Dorbar (ban mynjur ïa ka rai halor ka ILP) – ban weng noh ïa ki kyntien Khasi-Jaiñtia na ka ‘Preamble’ jong ka Bengal Eastern Frontier Regulation, 1873.
“Nga la dep kren ïa kane, nga ong ba ki sengbhalang ki la shah shet shukor, ki la shah phon ha ka Sorkar MDA. Mynta ki la dep law shuwa ïa ka mat halor ka ILP na ki kti jong ki, ki la dep ñiat sha Delhi ïa kane ka bynta,” la ong u Bah Basaïawmoit.
Shuh shuh u la kynthoh ba ki briew kiba don ïa kaba kum katei ka rukom pyrkhat, kim don ïa kata ka jingpyrkhat kaba kyrpang na bynta u trai-ri trai-muluk.
“Ha ki lehse la pynheh pynsan ïa ki shabar na kane ka ri jong ngi, kin ym sngewthuh ïa ka jingdonkam jong ki aiñ ban ïada ïa ngi,” la ong utei u nongïalam.
Nalor kane, u la bynrap, “Te ngam phylla ha ka jingkren jong ki, hynrei nga shu sngew synei ïa ki sengbhalang ba ki la shah shet bad shah phon ha ka MDA-I da kaba ki pynbiej ba ki mynjur ïa ka rai na bynta ban pyntreikam ïa ka ILP.”
