Shillong, Naitung 23
“Nga pyndep tang ka Klas-12 hynrei nga long kum u Symbud Myntri Rangbah ka Jylla”, la ong u Bah Sniawbhalang Dhar haba ai jingkren kum u kongsan haba pynkut ïa ka jingai jinghikai kaba tip kum ka ‘National workshop on the use and integration of swayam and credit transfer in context of NEP 2020’ kaba dei ruh ka sngi pynhap pyrda ban rakhe dap 60 snem ka jinghikai ïa ka science ha Shillong College kaba la pynkut ha ka Sngi Ba-ar ka 23 tarik Naitung.
Ha kane ka sngi ka Kong Ampareen Lyngdoh, Myntri ka tnad jong ka koit ka khiah ka la long kum ka Symbud kongsan ha jingïadonlang ki nonghikai bad ki samla pule kaba la bei tyngka da ka Chief Minister’s Youth Development Scheme jong ka tnad Directorate of Sports and Youth Affairs ka Sorkar Jylla.
U Bah Sniawbhalang haba ai jingkren ha kane ka sngi u la phla ba saw ngut ki paralok kiba leit science ha St Edmunds College ha u snem 2000 mynta ki la long doktor katba ma u, u shu pyndep tang ka klas-12 hynrei kaba phylla ba kine baroh saw ngut ki shait wan kyrpad ïa u ban pynkynriah kam.
U la ong ba ki don ki samla pule na Shillong College kiba wan ïakynduh ïa u ha Secretariat ban pan kam hadien ba la dep pule hynrei u la ong ba ka kam sorkar bad kam shimet ka ïapher bha.
Kumta u la ong ba wat la u pyndep tang klas-12 hynrei da ka jingtrei shitom u long u nongai kam haduh ar hajar ngut ha ka Dhar Company bad long ruh kum u Symbud Myntri Rangbah ka jylla.
U la ai khublei ïa ki paidbah ka Nartiang constituency kiba la ieid ïa u ban jied man ka shisien san snem haduh ban da ïoh shong kum u Symbud Myntri Rangbah ka jylla.
U la ïathuh haba u trei ïa ka kam lajong u hap ban trei shitom da kaba duh thiah ban pynlong ïa ka kam kaba seisoh.
Namar kata, u la kyntu ïa ki samla pule ba kim dei ban pyrkhat tang ban wad kam sorkar hadien ba ki la pyndep ïa ka jingpule hynrei ki dei ban trei ruh ha ki company bad seng kam lajong.
U la ïathuh ruh haba u ïakhun ïa ka ilekshon u don ruh ka jingthrang ban long Myntri ha ka Sorkar Jylla bad kane ruh ka la urlong.
