Shillong, Naitung 24
Ka kynhun ki Chief Executive Member (CEM) jong ki Autonomous Council na ki Jylla ka thaiñ Shatei Lam Mihngi ki la ap la ar sngi lynter ha nongbah New Delhi ban ïoh ïakynduh ïa u Myntri Korbar Ri, u Amit Shah na ka bynta ban pynsngew ïa kiba bun ki mat jingdawa kynthup ka jingpynkhlaiñ ïa ki Autonomous Council da kaba wanrah noh ïa ka aiñ ban pynkylla ïa ka Khyrnit Bahynriew (6th Schedule) jong ka Riti Synshar.
Ka kynhun ki CEM jong ki Autonomous Council na Assam, Meghalaya, Tripura bad Mizoram ki la don ha New Delhi ban ïoh ïakynduh ïa u Shah hynrei namarba ka Dorbar Lyiur jong ka Parliament ka la sdang, u Shah u khlem lah ban pyllait por ban ïakynduh khamtam namarba ka dorbar ruh ka wai slem.
Ka Dorbar Lyiur jong ka Paliament ka la sdang ha ka 22 tarik mynta u Naitung bad kan kut ha ka 12 tarik u bnai ban wan (Nailar).
U Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem, uba dei ruh u Convener jong ki 10 tylli ki Autonomous Council ha ka Thaiñ Shatei Lam Mihngi, u la ong ba ha ka jingshisha la dep pynbeit ban ïakynduh ha ka Sngi Balang (24 tarik), hynrei namarba ka dorbar ha ka Sngi Balang ka khlem pat wai haduh ka por janmiet, la pynkynriah ïa ka jingïakynduh bad u Shah sha ka Sngi Palei ha ka por 3 baje janmiet.
U la ong ba katba dang ap ban ïoh ïakynduh ïa u Myntri korbar ri u Amit Shah, ki CEM bad ki nongmihkhmat jong ki Council ki la bteng ban ïaphylliew jingmut para maki ha kaba la rai ban ïadonlang kawei kum ki Council kiba dei na ka Thaiñ Shatei Lam Mihngi khamtam ban pynkhlaiñ ïa ka sur jingdawa ha Delhi.
Ka kynhun ki CEM ka la don ha nongbah New Delhi naduh ka 20 tarik Naitung ha kaba la don ruh ka jingïakynduh para maki ban ïatai halor kiba bun ki mat ki jingeh kiba don ha la kijong kijong ki Council.
Ki CEM bad ki nongmihkhmat jong baroh 10 tylli ki Council ki la ban jur ba donkam ban wanrah noh ïa ka aiñ ban pynkylla ïa ka Khyrnit Bahynriew (6th Schedule) bad kin pynsngew ha u Amit Shah ba lada long kaba lah ban wanrah ïa ka Amendment Bill ha kane ka Dorbar Lyiur jong ka Parliament kaba dang ïaid mynta.
Hynrei kane ka jingkhmih lynti ba ka Sorkar Pdeng kan wanrah ha kane ka Dorbar Lyiur ïa ka aiñ ban pynkylla ïa ka Sixth Schedule kam da i donlad shuh namarba ka Sorkar Pdeng ka la dep buh lypa ïa ki Bill hapoh ka thup kiba dei ban wanrah ha Ïingdorbar Lok Sabha.
Ka Amendment Bill ha kaba ïadei bad ka Sixth Schedule kam shym la paw satia ha ka thup jong ki Bill kiba la pynmih da ka Lok Sabha Secretariat.
Ki Bill kiba dei ban wanrah ha Parliament ki kynthup, The Finance (No. 2) Bill, 2024, The Disaster Management (Amendment) Bill, 2024, Boilers Bill, 2024, The Bhartiya Vayuyan Vidheyak, 2024, The Coffee (Promotion and Development) Bill, 2024, The Rubber (Promotion and Development) Bill, 2024. Ïa kine ki Bill la dep pynrung lypa hashwa ban sdang ka Dorbar Lyiur jong ka Parliament.
