Shillong, Naitung 24
Ki shipai jong ka 101 Area ha Upper Shillong ki la ïoh ban kem noh ïa uwei u briew uba la kam bad leh mynleh ïalade kum u heh shipai jong ka Assam Regiment bad la suba jur ba u lah ban dei u nongsyntiat.
Kane ka jingïoh kem ïa une u briew uba la kam ïalade kum u Captain ka Assam Regiment bad uba la ïaid la ïeng ha ryngkat ka riam shipai bad rah ka suloi AK47, la kem noh ha ka janmiet jong ka 22 tarik Naitung na CSD Canteen.
Kane ka jingïoh kem ka long ruh hadien ba ka tnat syntiat jong ki shipai ka Ri India ki la ïoh jingtip ba don u briew ba ïaid ba ïeng ryngkat ka riam shipai bad ha kaba ki la buddien halor kane.
Une u briew uba la shah kem u dei ba la tip kyrteng kum u Sar Chehon Rongpi na Dokmoka jong ka Karbi Anglong District ka jylla Assam.
La ong ba une u briew ba la riam shipai bad leh mynleh kum u heh shipai u la ïoh ban rung ha bun ki ktem shipai kiba don ha ka nongbah Shillong.
Ha ka jingtohkit ïa ka mobile phone kaba la ïoh kurup na une u briew, la lap ba ki la don ki dur, ki dur khih kiba la shon bad ring ïa ki ktem shipai, kynthup ïa ki convoy jong ki shipai bad kiwei kiwei ki kot ki sla.
Ha ka jingtohkit, la shem ba u Rongpi u la treikam ha ka thaiñ Arunachal Pradesh bad u la ïoh ban rung khlieh hapoh ka len jong ki shipai. Baroh shikatta u la leh mynleh kum u Captain ki shipai bad u la leit shakri ha manla ki khyrdop jong ka 101 area Army base.
Hadien ba la ïoh kem, ïa u Rongpi la aiti noh sha ki pulit ka thanat Jhalupara ha ka miet jong ka 23 tarik mynta u bnai khlem kano-kano ka jingmynsaw.
