Jowai, Naitung:
Ka Jaiñtia Hills Development Society (JHDS) ryngkat ka jingïatreilang bad ka National Bank for Agriculture & Rural Development (NABARD) ha ka 23 tarik Naitung ki la plie ïa ka ïew (Rural Haat) hapoh ka shnong Namdong B.
Ka jinglut-jingsep ban tei ïa kane ka ïew la bei tyngka da ka NABARD ha ka dor T.16 lak. La pyntrei bad pynbit pynbiang da ka Jaiñtia Hills Development Society kaba long kawei na ki seng treimon sngewbha hapoh ka District.
Ïa kane ka ïew la plie paidbah da ka Kong JR Blah OIC/General Manager NABARD RO, Shillong ha ka jingdonlang u Bah Dawan Lyngdoh, MDC Mynsngat-Khanduli Constituency, u Dr. H Niang, Block Development Officer Namdong C&RD Block, ka Kong SN Lamare, AGM NABARD Jaintia Hills, u Fr. Manbha Pakem Director ka JHDS, u Bah DS War, Waheh Shnong Namdon-B, Bah Lambor Lyngdoh, Acting Waheh Raij Namdong bad Bah Denis Kurkalang Coordinator JHDS.
Haba ai jingkren ka Kong JR Blah ka la pyni ïa shibun ki jingmyntoi ba kane ka ïew ka lah ban ai sha ki nongshong shnong. Ka la pynpaw ruh ïa ka jingsngewnguh ïa baroh kiba la ïadonbynta ban shna bad pynbit pynbiang ïa katei ka ïew. Shuh shuh ka la ban khia ruh ïa ki nongshong ïew ba ki dei ban sngewtrai bad lehkhuid ïa katei ka jaka khnang ban wanrah ïa ka koit ka khiah kaba bha ba miat.
Da ka mynsiem ba sngewnguh, u Fr. Manbha Pakem u la ai khublei bad ïaroh ïa ka NABARD kaba la ïarap pisa ban shna ïa katei ka ïew. U la kubur ruh ba kane ka ïew kan wanrah ïa ka lad kamai jakpoh ïa ki longkmie bad ki nongrep jong katei ka thaiñ hi baroh kawei.
Ka Kong SN Lamare, AGM NABARD haba ai jingkren ka la pynshlur ïa ki longkmie kiba don ha ka Self-help Group bad ki nongrep ba kin pyndonkam hok ïa katei ka ïew kaba ki la ïoh khnang ban kyntiew ïa ka ïoh ka kot hala ïing la sem. Shuh shuh la ai ka jingïaroh khamtam ïa ka Jaintia Hills Development Society kaba la trei shitom ban pynbit pynbiang ha ka jingtei ïa katei ka ïew.
U Dr. H Niang u la kyntu ïa ki bor ba dei peit ban kin wanrah shuh shuh ïa ki kam pynroi sha katei ka thaiñ kaba dang sahdien ha kiba bun ki liang.
