Nongstoiñ, Naitung 24
Ka KSU Mawshynrut Circle haba pynlong jingkhynra ïa ki nongbylla bar jylla kiba trei ha ka Company M/s Agarwal Construction Private Limited bad ha ki katto katne ki jaka jong ki ‘riewshimet, ka la lap palat sanphew ngut ki bym biang ïa ki kot ki sla wat ban pynshisha ba ki dei ki nong India.
Ïa kane ka jingkhynra la pynlong hapoh ka jingïalam jong u Samla Ulysis Ryntong General Secretary bad U Samla Korbarlang Marthong Assistant Organising Secretary ha ryngkat ki dkhot ka la leit ban khynra ïa ki bar jylla ba trei ha ka Company M/s Agarwal Construction bad ha ki katto katne ki jaka jong ki ‘riewshimet. Ha katei ka jingleit khynra la lap palat sanphew ngut ki bym biang ïa ki kot ki sla wat ban pynshisha ba ki dei ki nong India.
Ki nongïalam ka KSU Mawshynrut ki la ong ba ha katei ka jingkhynra, na ka liang ka seng ka la phah leit phai noh mar-mar ïa kine ki bar jylla sha ka jaka ba ki wan.
Shuh shuh ka KSU ka la ong ruh ba ha kane ka jingkhynra, la lap ruh ba ki don ba wanrah ïa ki khynnah ban pyntrei kiba dang hapoh ka 13 snem ka rta kaba long pyrshah ïa ka Child Labour Act 1986. Na ka liang ki nongïalam ka seng ki la buh jingkylli, hato ka sorkar kan pynshitom ne em ïa kita kiba wanrah ïa ki khynnah rit ban pyntrei?
Ki la ong ruh ba ki bar jylla mynta ki ïoh ban rung katba mon sha ka jylla khlem ki kot ki sla kiba biang hynrei kaba sngewlyngngoh ka long kata ka khyrdop talasi (Infiltration Check Gate) kaba don ha Aradongnga ka leh aïu haba ki bar jylla ki lah ban mih ban rung katba mon wat ki bym don ïa ki kot ki sla kiba biang.
Ka seng ka pynrem ruh ïa ka jingdkoh treikam jong ka tnat Infiltration bad dei na ka jingbym treikam bha jong ki kan sa pynlong ïa ki bar jylla ban ïoh mynsiem ban rung katba mon.
Ha kajuh ka por ka seng ka la maham tyngeh ruh ïa ki ‘riewshimet kiba wanrah ïa ki bar jylla ha kaba kim kheiñ shuh ïa ka ïap ka im ki paidbah tang ban ïohnong shimet.
Ka seng ka la phah ruh ka kyrwoh kaba shai ba kan dang ïai bteng ban khynra ïa ki bar jylla hapoh ka dong ka thaiñ, la ong ka kyrwoh na ki nongïalam ka KSU Mawshynrut.
