Shillong, Naitung:
Ka Akhil Bharatiya Vidyarthi Parishad (ABVP) Meghalaya Unit kaba dei ka kynhun ki khynnah pule kaba ïasnoh bad ka Bharatiya Janata Party (BJP) ka la pdiang sngewbha ïa ka mang tyngka jong ka Lok Sabha ba la wanrah hapoh ka Dorbar Parliament ha ka 23 tarik u Naitung 2024.
Na ka liang u Tengku M. Marak, State Secretary ka ABVP, u la ong ba ka mang tyngka ka pynpaw ïa ki jingthmu ba shai jong ka sorkar u Narendra Modi ha ki bynta bapher bapher kiba kongsan.
U Marak u la kdew ba ka mang tyngka ka la mang T. 1.48 klur na ka bynta ka pule puthi, ka kam ka jam bad ki kam pyntbit, ha kaba T. 1.25 klur la mang kyrpang na ka bynta ka pule puthi.
U State Secretary ka ABVP Meghalaya u la ïaroh ïa kane ka jingshimkhia jong ka sorkar u Myntri Rangbaduh ka Ri ha ka pule puthi bad ka jingpynkupbor ïa ki samla.
“Kane ka jingai pisa la khmih lynti ba kan kyntiew ïa ki jingtei ha ka liang ka pule puthi, kan pynbha ïa ka jingnang jingstad bad kan pynïar ïa ki jingthmu ban pyntbit, da kaba lah ban thaw ïa ki lad kamai kiba kham bha na ka bynta ki samla,” u la ong.
