Nongstoiñ, Naitung:
U Deputy Chief Executive Member jong ka Khasi Hills Autonomous District Council (KHADC) u Bah Pynshngaiñ N Syiem ha ka Sngi Balang u la hiar ban jurip ïa ka shlem treikam jong ka District Council Court Nongstoi, na ka bynta ban pynkhlaiñ shuh shuh ïa ka rukom treikam jong kane Council nalor kiwei pat ki kam kaba ïadei bad ka professional tax bad ruh ban pynbha bad pynitynnad ïa ki jaka treikam jong ka Council.
Haba kren sha ki lad pathai khubor hadien ba la dep ban jurip, u Bah PN Syiem u la ïathuh ba ka District Council Court ha Nongstoiñ ka la sdang ban treikam naduh u snem 2021 hadien ba la buh ïa ki magistrate ha manla ki District bad la sngewthuh ba mynta la kumba ar spah tam ki mukotduma (case) la shim ha kane ka court bad kumba 25 tylli eiei ha ka shi sngi.
U la ong ruh ba ka jingwan ka jong u ban jurip ka long ban peit ïa ka jingbit jingbiang jong ki kamra treikam kum ka kamra bishar (court room) bad kiwei kiwei. U la ong ruh ba ha kaba ïadei bad ki nongtrei, ka donkam ban nang pynkhlaiñ shuh shuh khnang ba kan pynsuk ïa ka court bad ka tnat Tax.
U la ïathuh ruh ba ka jingdon jong ki court ka council ha ki District ka la pynkham sted shibun ïa ki mukotduma bad kumba long mynshuwa ba ka don tang ha Shillong ka kham shitom ban pyndep ïa kiba bun ki mukotduma.
Ha kane ka sngi ïa u Deputy CEM ka KHADC la synran lang da ka Kong V Mawlieh, Judicial Magistrate 1st Class Subordinate District Council Court, Khasi Hills Nongstoiñ, ka Kong SB Laitthma Judge ka KHADC, u Bah MG Nongsiej, Superintendent of Professional Tax, Nongstoiñ bad kiwei kiwei ki ophisar jong ka Council.
