Shillong, Naitung:
Ka Federation of Khasi Jaiñtia & Garo People (FKJGP) ka la pynpaw ïa ka jingkmen ba hadien shisnem, ka jingdawa ba ka la buh ka la wan urlong ha kaba ka shlem treikam jong u Chief Postmaster General ka la pynrung ïa ka ktien Khasi bad Garo kum ka ktien bynrap ban thoh ïa ka eksam Gramin Dak Sevak (GDS) ha Ïing Dak.
Lah ban kdew ba ki nongïalam ka FKJGP ha ka Sngi Balang ki la leit pan jingshai na ki bor khmih ka Ïing Dak halor ka jingthungkam ïa ki Gramin Dak Sevak (GDS) ha ki Ïing Dak ba don hapoh ka Jylla Meghalaya.
U President ka FKJGP Sengkmie, Bah Dundee C Khongsit, u la pynaw ïa ka jingkmen ban ïoh ïa ka jingthoh na ka shlem treikam u Chief Postmaster General ba la pynrung ïa ka ktien Khasi bad Garo ha ka ban thoh eksamin Gramin Dak Sevak.
Haba kren sha ki lad pathai khubor hadien ba la ïoh ïa ka kot jingpynshisha ba la pynrung ïa ka ktien Khasi bad Garo kum ka ktien bynrap, u la ong ba mynta ki samla wad kam ki la lah ban jied ïa ka ktien ban thoh eksam da ka ktien Khasi bad Garo nalor ka phareng.
U Bah Dundee u la ong ha kane ka jingleit ïakynduh ïa ki heh ka ophis CPO, jan baroh ki 445 tylli ki kam Gramin Dak Sevak ki dei kiba la thung ïa ki briew nabar ka Jylla. U la ong ba kane baroh ka dei namar ka jingbym ïohlad ban jied ïa ka ktien Khasi bad Garo ha ka eksamin thungkam, kaba long ka jingduhnong ïa ki samla trai Jylla.
Shuh shuh u la kdew ba ha kine ki Jylla ka thaiñ shatei lam-mihngi kum ka Mizoram, Manipur bad Nagaland, la shah ïa ki nongthep kam ba kin thoh ïa ka eksamin da ki ktien lajong.
U la ong ba kum ka seng ka pynrem ïa ka Sorkar Jylla halor ka jingbym leh eiei ïa kane ka kam mynta la ar-lai snem namar ha ka jingïakren bad ki ophisar ka Post Office, la sngewthuh ba ka dei ka kamram jong ka Sorkar Jylla ban thoh sha ka Ministry of Communication bad Central Post Office, khnang ba ki samla Khasi-Jaiñtia bad Garo kin ïoh ïa ka lad ban thoh ïa ki eksam da ka ktien Khasi ne Garo.
U la ong ruh ba ha kane ka jingïakynduh, la shem ba ki dang don haduh 683 tylli kam bapher-bapher ki ban sa lait jong ki Ïing Dak ha Meghalaya bad ki bor pynïaid ka Ïing Dak ki la dep thoh sha ka Ministry of Communication bad Department of Post Office ka India ban pyntreikam ïa ka “Optional Language System” na ka bynta ki samla Khasi-Jaiñtia bad Garo.
