Shillong, Naitung:
U Pa’iem Freeman Sing Syiem, Syiem ka Hima Sohra ha ka 20 tarik u Naitung, 2024 ha ka jingïadonlang u Secretary, u Bah BV Rymmai, ki Myntri ka Hima, u la pynskhem ïa u Bah Sordron Nongrum kum u Myntri bathymmai jong ka Hima.
Ha ka jingpynbam smai la ong ba la pynskhem ïa u Bah Sordron ban long kum u Myntri ban ïa synshar ryngkat bad u Syiem ïa ka it ka hima, u ‘saiteh ‘saikhum, ka diengsong, ka nar ka bili, ka daiñ ka kuna, ka kuna ka kait, ka ïew ka hat, ka duwar ka lynti bad ban saiñ ban tiah ban synshar halor ka Hima khnang ban bha ka kynthei ka khynnah, u khun u hajar, u ban nangroi nangpa, ban ïoh ja ïoh dohkha, ban khraw ka spah ka hajar bad ban khraw ka burom jong ka Hima Sohra.
“Nga pynkup ïa ka jaiñspong ha phi u Sordron Nongrum ba phin eh ka rngiew ka rwiang, nga ai ha phi kum ka dak ba phin bam smai, ba phin nym shet kylla ïa nga u Syiem bad ïa ka Hima Sohra hi baroh kawei,” la ong ka jingpynbam smai.
Kum ban shu kdew ba u Bah Sordron un mih bujli ïa ka Kur ha ka Hima Sohra hadien ka jingkhlad noh u Myntri Kodin Nongrum ha u bnai Ïaïong, 2024.
Na ka liang u Bah Sordron ruh kum u Myntri bathymmai u la pdiang sngewbha ïa ka jaiñspong na u Pa’iem ryngkat ka jingkular ban nym shet kylla ïa u Syiem bad ïa ka Hima baroh kawei.
