Nongstoiñ, Naitung:
Ka HYC Nongjri Unit kaba hap hapoh ka HYC Nongtrai Circle, ha ka Sngi Balang ka la leit ban pynlong ka jingjurip ïa ka Sub-Centre Nongjri kaba hap hapoh ka jingpeit jong ka CHC Riangdo ha West Khasi Hills.
Ïa kane ka jingleit jurip la ïalam da u President ka seng u samla Spailin Wanniang bad u General Secretary samla Kitdorwell Kharsnar ryngkat ki Sordar Secretary na lai tylli ki shnong.
Ha kane ka jingjurip, ka HYC ka la lap ba ka surok na Nongjri shaduh ka Sub-Centre Nongjri kaba don kumba 1 kilometer shiteng eiei, kam long kaba bha wat ki kali heh lane kali rit, ki ar shaka ruh kim lait ban poi sha kane ka sub-centre, bad halor kane ka jaka sumar la ïathuh ruh ba ki rangbah shnong katei ka thaiñ ki la leit buh ruh ïa ka jingthoh sha ophis PWD la arsien hynrei haduh mynta ym shym la ïohi dak eiei.
La ïathuh ruh ba na ka liang ka HYC Nongjri Unit ka la ïoh ban kren bad ki ASHA kiba la trei hangto naduh u snem 2011 haduh kine ki sngi ba katno ki sngewjynjar bad khamtam ki nongpang kiba armet katno ki kwah ban leit shim dawai leit sumar leit kha khyllung ha kane ka jaka, hynrei ki duh mynsiem noh na ka daw ba ki hap ban ïaid da ka kjat ka pynlong ba ki hap ban kha ha ïing bad ki hap ban leit sha CHC Riangdo.
Kumta na ka liang ka seng ka kyrpad na ka tnat PWD Road ba kan shimkhia ha kaba ïadei bad kane ka bynta, bad ruh ka kyrpad sha ka tnat ka koit ka khiah ba kan khmih lem ïa ki jingeh jong kane ka sub centre.
Shuh shuh ka HYC ka la dawa na ka Sorkar Jylla lyngba ka tnat ba dei peit bad kumjuh ïa u MLA ka thaiñ ban shimkhia ban kyntiew kyrdan noh ïa katei ka sub center sha ka PHC.
