Shillong, Naitung:
Kumba 60 tylli ki jaka sangeh rel ha ki Jylla bapher bapher ka thaiñ Shatei Lam Mihngi yn sa pynlong kum ki “Amrit Station” kynthup ïa ka jaka sangeh rel ha Mendipathar ha Rilum Garo.
Ka Amrit Bharat Station ka dei ka skhim jong ka Sorkar Pdeng lyngba ka tnat rel ha kaba ki jingdonkam ha ki jaka sangeh rel kin long kiba kham biang naduh ki jingai jingtip ïa ki nongleit jingleit.
Ka jaka sangeh rel ha Mendipathar ka dei kaba don ha Meghalaya ha North Garo Hills district.
Kiwei pat ki jaka sangeh rel ki ban pynlong kum ki Amrit Station ki long ka Naharlagun ha Arunachal Pradesh, Imphal ha Manipur, Sairang ha Mizoram, Dimapur ha Nagaland, Rangpo ha Sikkim, Agartala, Dharmanagar, Kumarghat bad Udaipu ha Tripura.
Tang ha Assam ki don haduh 50 tylli ki jaka sangeh rel kiba rung hapoh kane ka skhim kiba kynthup ïa ka Amguri, Arunachal, Chaparmukh, Dhemaji, Dhubri, Dibrugarh, Diphu, Duliajan, Fakiragram Jn., Gauripur, Gohpur, Golaghat, Gosai gaon hat, Guwahati, Haibargaon, Harmuti, Hojai, Jagi Road, Jorhat Town, Kamakhya Jn, Kokrajhar, Lanka, Ledo, Lumding Jn, Majbat, Makum Jn, Margherita, Mariani Jn, Murkongselek, Naharkatiya, Nalbari, Namrup, Narangi, New Bongaigaon Jn, New Haflong, New Karimganj Jn, New Tinsukia Jn, North Lakhimpur, Pathshala, Rangapara North Jn, Rangiya Jn, Sarupathar, Sibsagar Town, Silapathar, Silchar, Simaluguri, Tangla, Tinsukia, Udalguri bad Viswanath Chariali.
U Myntri ka tnat rel u Ashwini Vaishnaw u la ong ba ka mang tyngka jong ka Sorkar Pdeng na ka bynta ka tnat rel ka long T.10,376 klur ha ka thaiñ Shatei Lam Mihngi kaba long san shah ka jingkiew na ka mang tyngka ha u snem 2009-2014.
La ïathuh ba la mang T.74,972 klur na ka bynta 18 tylli ki projek lynti rel kynthup ki jingshna lynti rel thymmai kumba 1,368 km.
