Nongstoiñ, Nailar:
Halor ki saw tylli ki mat na ka bynta ban pynkhlaiñ talasi ne peit bniah ïa ka rung ka mih ki briew nabar jylla ne nabar Ri ruh kumjuh kiba wan ban bylla hapoh ka thaiñ West Khasi Hills District, ha ka Lah Sngi U Blei ka Hynñiewtrep Youths’ Council (HYC) West Khasi Hills ka la leit ban ïakynduh bad aiti ruh da ka dorkhas sha u Deputy Commissioner ka West Khasi Hills ban dawa shim khia.
Katkum ka dorkhas, ka HYC ka la pynpaw ba kam lah ban shu sngap ban ïohi ïa ka jingeh jong ki paidbah jong ka dong ka thaiñ khamtam ka jingma ïa ki paradoh parasnam, kumta lyngba ka dorkhas ka dawa na u DC ban shimkhia halor ki mat ïa kaba ka HYC kala buh.
Katkum ka dorkhas, ka la pynpaw ba ka HYC kam hun ban shu peit ne sngap haba ïohi lyngba ki Social Media ïa ka jingïohlad jong ki briew na ka Ri Bangladesh ban ruh hapoh ka jylla.
Ka HYC ka la pynpaw ruh ba kaba ma eh ka long na ka daw jong ka jingdon ka jingïakhih ha Ri Bangladesh hapdeng ki khynnah Pule pyrshah ïa ka Sorkar Bangladesh, ha kaba la don ruh ka jingïap briew bad kane ka lah ruh ban pynlong ïa ki nongshong shnong ka Bangladesh ban sngewsalia ïa kane ka jingïakhih bad pyrshang ne thmu ban rung shapoh Meghalaya lane lyngba kiwei ki jylla bad lehse kane kan buh jingma ïa ki nongshong shnong ka jylla.
Kumta, ka HYC ka la dawa ban pynkhlaiñ ïa ka jingpeitngor ban nym ailad ba kin ïoh rung hapoh ka thaiñ.
Shuh shuh ka HYC ka la pynpaw ba namar ka jingbym khlaiñ ki aiñ lane ka jingbym don ka ILP kum kiwei ki jylla ha North East, la ïohi ki briew kiba nabar jylla ki ïohlad bha ban wan shapoh ka jylla ha ka dur kum ki nongwan jngohkai lane kum ki nongwan bylla ha ki karkhana, ha ki jingshna surok, ki nongwan trei ïing bad kiwei kiwei de, kane ka jingïohlad kaba kumne ka wanrah ka jingma namar kine tang shu don ka EPIC bad Aadhar Card ki lah ban ïoh suk ïa ka Labour Licence ban trei namar ki kyndon jong ka Labour kim khlaiñ.
Ka HYC ka la pynpaw ba ka kwah la kumno kumno ki pulit Infiltration kiba peit ïa ka rung ka mih kiba don hapoh ka thaiñ ki dei ban long kiba khlaiñ bha ban peit ïa ka rung ka mih, ki kot ki sla ban nym ailad ba kin ïoh rung ki briew kiba la don ki dak sniew kiba wanrah jingma ïa ka thaiñ.
Ka HYC ka kwah ban don sa kawei ka Police Infiltration Check Gate ha ka thaiñ Langpih. Ha ka jingïohi jong ka seng donkam ban buh ha shnong Khamphaduli namar ka dei ka khappud bad ka jylla Assam. Lada lah ban buh hangne kan ïarap bha ban talasi (Check) ïa ka rung ka mih na shabar shapoh ka thaiñ.
Kumta halor kitei ki mat, ka HYC ka kyntu ïa u DC ban shim khia khnang ba ki paidbah kin ïoh ïa ka jingshongsuk lym kumta na ka liang ka seng kam banse ban mih shakhmat ban ïada ïa ki nongshong shnong lada ki bor pynïaid district kim lah ban shim khia.
