New Delhi, Nailar 06
Ka jingkyrpad na ka Sheikh Hasina ban wan sha India ka la long ha ka por kaba lyngkot bha hadien ba ka la hiar noh na ka shuki Myntri Rangbahduh jong ka Bangladesh.
Ïa kane la ïathuh da u Myntri ka tnat bar ri, u S Jaishankar, haba ai jingkren ha Parliament ha ka Sngi Ba-Ar ha kaba u la batai shaphang ka jinglong-jingman ha Bangladesh.
U la ïathuh ba ki don kumba 19,000 ngut ki nong India ha Bangladesh, bad u la ong ba ka sorkar India ka ïakren bad ki lyngba ki shlem jong ka bad u la kyntu ïa ka Bangladesh ban pynbiang ïa ki lad pahara na ka bynta kine ki nongshong shnong. Na kine ki 19,000 ngut, kumba 9 hajar ngut ki dei ki samla pule. Hynrei kiba bun na kine ki samla pule ki la wan phai sha India mynshem bnai.
U Jaishankar u la ong ba ha ka 4 tarik Nailar, ki jingïakynad ha Bangladesh ki la shyrkhei bha ha kaba ki bor pulit ki la shah thombor bad ki jingdon-jingem jong ki ‘riew paidbah kiba don jingïadei bad ka liang synshar ki la shah thang. Nalorkata, u la ong ba ki rit paid bad ki temple ruh ki la shah thombor lang ha kiba bun ki jaka.
Shuh shuh u la ong ba ha ka 5 tarik Nailar, ki paidbah ki la ïalum ha Dhaka wat hapdeng jong ka jingpynjari ïa ka korphiw. Ka jingsngewthuh ka long ba hadien ka jingïalang bad ki bor pahara, ka Myntri Rangbahduh, Sheikh Hasina, ka la shim ïa ka rai ban hiar shuki noh. Ka jingkyrpad na ka ban wan sha India kumba katto katne por ka la long ha ka por ba lyngkot bha, bad ha kajuh ka por, la ïoh pdiang ïa ka jingkyrpad ban shah ïa ka liengsuiñ ba kan wan rung sha India, bad ha ka por janmiet, ka Hasina ka la wan poi ha India, la ong u Jaishankar.
U la ong ruh ba ka sorkar India na ka por sha ka por ka la ïakren bad ki bor ba dei khmih ha Bangladesh. Ha kaba ïadei bad ki rit paid namar 90 na ka 100 ha Bangladesh ki dei ki Muslim, u Jaishankar u la ong ba ka sorkar ka long kaba peitngor wat la ki don ki khubor kiba ong ba ki bor ha Bangladesh ki la shim ïa ki sienjam ban ïada ïa ki rit paid.
