Shillong, Nailar 06
Ki nongshong shnong ba shong ba sah ha ki thaiñ khappud ka Jylla ki la ong ba kam shym la don kano-kano ka jingwan tur jong ki nong Bangladesh sha India bad ka jingshad kmen jong ki briew na katei ka ri (Bangladesh) ha ka Lah Sngi U Blei ka dei hapoh u pud u sam jong ka ri lajong – ha khyrdop khappud ka India-Bangladesh kaba don ha Tamabil-Dawki.
Ïa kane la pyntikna da u Bah Kmen Myrchiang, uwei na ki nongshong shnong ba shong ba sah ha ki thaiñ khappud ka West Jaiñtia Hills.
“Ban ong ba ka don ka jingwan tur ki nong Bangladesh sha India, ka long kaba bakla. Hadien ka jingieh noh kam ka Sheikh Hasina kum ka Myntri Rangbahduh, ki paid nongshong shnong ka Bangladesh hynnin ka sngi ki la wan risa bad kynhoi hapoh u pud u sam lajong bad kim shym la tam sha India,” la ong u Bah Myrchiang.
Kum ban shu kdew hangne, ha ka Lah Sngi U Blei, ka la don ka jingsaphriang jong kawei ka dur-khih kaba pyni kumba ki briew na Bangladesh ki la wan tur sha khappud Tamabil, Dawki.
Kumjuh ka la don sa kawei ka dur-khih kaba la saphriang kaba pyni kumba ki briew na Bangladesh ki dang ïalum ha khappud ha ryngkat ki jingpynthaba jingshai lyngba ki ‘mobile phone’ jong ki.
Halor kane, u Bah Myrchiang u la ïathuh ba ha shuwa, ka Sorkar Bangladesh ka la khang pyrshah ïa ka jingkhlong maw na ki wah kiba don ha khappud bad ka India naba kane ka lah ban ïalam sha ka jingkylla jong ka lynti ïaid ka um bad kumta ym shym la shah shuh ban khlong maw.
“Ha ki snem ka Sorkar ka Sheikh Hasina, ïa kane la khang, hynrei haba ka Sorkar ka la khyllem, ki briew na Bangladesh ki la wan khlong biang ïa u maw hapoh u pud u sam jong ki bad kim shym la wan tur sha ngi,” u la ong.
Na ka liang jong u, u la ong ruh ba ki shipai ka ri ki la don ha Nongtalang kum shi bynta ban peitngor ïa ka jinglong shngaiñ jong ki jaka khappud.
“Ban ong ba ki wan sha India, kam don kaba kum kata, ym shym la don ba wan kiew bad ka jingshad kmen jong ki ka long ha khyrdop khappud ka India-Bangladesh ha Tamabil-Dawki. Kim shym la tam wat ïa u ‘Zero Point’. Kiba wan khlong maw ruh ka dei hapoh u pud u sam jong ki watla ki la pynkheiñ ïa ka kyndon jong ka jingkhang ban khlong maw,” u la ong.
Namar ka jinglong-jingman ha Bangladesh kaba la poi shaduh u pud ba ka Myntri Rangbahduh ka ri, ka Sheikh Hasina (kaba la ieh noh kam) ka hap ban wan phet sha India, ka Sorkar Jylla ka rai ban pynjari da ka korphiw ha shi lynter jong ki jaka khappud hapdeng ka Meghalaya bad Bangladesh bad ïa kane ka korphiw la pynjari 12 kynta hapoh 200 mitar na khappud.
Ka korphiw ha kine ki 200 mitar na khappud kan treikam naduh 6 baje janmiet haduh 6 baje mynstep man la ka sngi tad haduh ban da pynbna da kumwei pat.
