Shillong, Nailar 06
U MP ka Voice of the People Party (VPP), Dr. Ricky A.J. Syngkon ha ka Sngi Ba-ar u la ïakynduh ïa u Myntri ka tnad kam pohïing ka Sorkar Pdeng, u Amit Shah ban ïakren halor ka jingbuh jingma jong ka jinglong-jingman ki kam saiñ pyrthei ha Bangladesh khamtam ïa ka Jylla bad ka ri hi baroh kawei.
Ha ka kyrwoh khubor, u nongaitkien ka seng, Dr. Batskhem Myrboh u la ong ba u MP u la kyrpad ïa u Myntri kam pohïing ban pynkhlaiñ ïa ki bor ïada bad jingpahara ha ki jaka khappud kumjuh ban peitngor ïa ka jingwan rung be-aiñ sha ka Jylla – kaba buh jingma shi kat dei ïa ki trai-ri jong ka Jylla.
Na ka liang u Myntri kam pohïing u la kular ban pynneh ïa ka jingpeitngor ha baroh ki liang hapoh ka jingkhmih jong u ophisar ha ka kyrdan IG.
“Na ka liang u Dr. Syngkon u la kyrpad ruh ïa u Myntri ban phai khmat lem bad shimkhia ïa ka jingeh halor ka jinglum pisa be-aiñ da ki briew ha ka ‘uniform’ ha shi lynter ki surokbah kiba don hapoh ka Jylla,” la ong u Dr. Myrboh.
