Jowai, Nailar:
U Symbud Myntri Rangbah ka jylla, Bah Sniawbhalang Dhar uba long ruh u MLA ka thaiñ ha ka 3 tarik Nailar u la hiar dalade ban leit jngoh ïa ka ïew Muchai kaba don ha ka shnong Mynsngat ha West Jaiñtia Hills.
Kane ka ïew kaba dang shu sdang thymmai ha u snem 2022 kaba hap hapoh ka jingpeit jong ka shnong Mynsngat bad ka District Council, ka dei kaba shait long shisien shi taïew ha ka sngi Muchai katkum ka rukom kheiñ sngi ïew ki nong Jaiñtia.
La synran lang ïa u Symbud Myntri Rangbah ha kane ka sngi da ki nongïalam shnong bad ki ‘riew rangbah jong ka thaiñ.
U Bah Sniawbhalang Dhar u la ïasyllok bad ki nongshong ïew ban sngap ïa ki jingeh jong ki bad kumjuh ban sngap ïa ka jingai jingmut jong ki kumno ban pynbha shuh shuh ïa kane ka ïew bad ka khaïi ka pateng ha kane ka thaiñ.
Ka Nartiang Constituency ka long kaba donbok shibun eh, namar ka don haduh kumba 6 tylli ki ïew bad kane kan plie lad plie lynti ïa ka khaïi ka pateng ka ban pynkiew ïa ka ïoh kam ïoh jam bad ka ïoh ka kot jong ka thaiñ hi baroh kawei, la ong u Bah Sniawbhalang.
