Nongpoh, Nailar 06
Kiba bun tylli ki shnong kiba hap hapoh ka Jirang Konstitwensi ki la shah ktah jur na ka jingwan ther jong u ‘lapbah ba jur ha ka Lah Sngi U Blei uba la neh da ki bun kynta.
Halor kine ki jingshah ktah, ha ka Sngi Ba-ar u MLA ka Jirang u Bah Sosthenes Sohtun u la hiar ban leit jngoh sha kylleng ki shnong kiba la shah ktah ban khmih dalade halor ka jingshah ktah na ka jingshlei um kaba jur hynnin ka sngi hadien ka jingther jong u ‘lapbah uba la neh da bun kynta.
Haba kren sha ki lad pathai khubor, u Bah Sosthenes Sohtun u la ïathuh ba katei ka jingshlei um ha ka Lah Sngi U Blei ka la long kaba jur shaba palat, ha kaba bun tylli ki skul ha ki thaiñ khappud naduh Jorabat ter ter shaduh Khanapara ki la shah ktah na ka jngshlei ka umsaw ha ki kamra klass, bad la hap ban ai shuti noh ïa ki khynnah skul ha kane ka sngi.
Nalor kitei ki skul, ka jingshah ktah ka dei ruh ïa ki ïing briew, ki jingthung-jingtep, ki surok ha kiba bun tylli ki shnong kiba hap hapoh ka Jirang konstitwensi, khamtam ha ki bynta jong ka Baridua, Killing, Umtyrnga, Nongspung bad kiwei kiwei.
Na ka liang u Bah Sosthenes u la pyntip ruh ba na ka liang u Deputy Commissioner ka Ri Bhoi, u Abhilash Baranwal, u la bthah ïa u Block Development Officer bad ki Gramsevak ba kin leit sha kito ki shnong kiba shah ktah, ban khmih bniah ïa ka jingduhnong jong ki paidbah bad ruh khamtam eh ban pynkloi ïa ki lad jingïarap kiba kyrkieh sha ki lanot kiba la shah ktah.
