
Shillong, Nailar 06
U Working President jong ka Meghalaya Pradesh Congress Committee (MPCC) u Bah Pynshngaiñ N Syiem uba long ruh u Deputy Chief Executive Member ka Khasi Hills Autonomous District Council (KHADC), u la ong ba ka seng kan sa ïakynduh ïa 3 ngut ki MLA Congress ban ïasyllok la ka dei shisha ne em ba ki thmu ban rung sha ka seng National People’s Party (NPP) kumba la mih ha ki kot khubor.
Haba ïakren bad katto-katne ki nongthoh khubor ha kamra treikam u Bah PN Syiem ha KHADC, u la ong ba haduh mynta um pat don jingtip ïa kine ki lai ngut ki MLA Congress kiba thmu ban rung sha ka NPP.
U la ong ba u ïohi ha ki lad pathai khubor ba kine ki MLA kin sa rung ha ka seng NPP hynrei un ap tang ïa ka por la ka dei ne em kaba shisha.
U Bah Pynshngaiñ u la ong u Bah Vincent Pala, President ka MPCC u lah ban ïajan badno-badno tangba ka nongrim jong ki seng saiñpyrthei ka dei la ka jong hynrei ïa kata ka jingïadei paralok ka dei tang ka jingkynnoh.
“Haduh mynta ngam nud ban ong la kane ka jingmih khubor ka dei kaba shisha ne ka bym shisha hynrei ngin ap ïa kata ka por kumba la thoh ba ‘shen'” u la ong.
U la ïathuh ba ka jingïatreilang ki MDC ka Congress bad ki MDC ka NPP ha KHADC la khot jingïalang da ka MPCC bad la rai ban ïatreilang namar ki don ki aiñ kiba hap ban ïakren na ka bynta ka jingmyntoi jong ka jaidbynriew.
Ha kajuh ka por u la pynshai ba haduh mynta kam don kano-kano ka jingïapher jingmut kumba la kynnoh hynrei ki dang ïatylli baroh ha ka seng Congress.
Ki khubor ki ïathuh ba kine 3 ngut ki MLA ban rung sha ka seng NPP ki long u Dr. C Lyngdoh na Umsning, Bah Charles Marngar na Mawhati, Bah Gabriel Wahlang na Nongstoiñ bad ba sah satang u Bah Ronnie V Lyngdoh na Mylliem Constituency uba dei u nongïalam ka liang pyrshah ha ïingdorbar thawaiñ.