Shillong, Nailar 06
Ki nongtrei hapoh ka skhim Samagra Shiksha ha kane ka Jylla ki la sngew kmen namar ka jingpynbeit thymmai ka Sorkar ban pynkiew ïa ka tulop bad ki la ong ba kane ka jingpynkiew tulop ka long kaba shongnia khamtam ïa ki nongtrei kiba kham ïoh duna ka jingsiew.
Ki nongtrei hapoh ka skhim Samagra Shiksha ki dei kiba kynthup ïa ki District Coordinators, State Coordinators, System Analyst, Block Resource Person (BRP), Cluster Resource Person (CRP), Data Entry Operator (DEO), MIS Coordinator, nalor ki accountant ha Block bad District, ki nongñiah kali, nongrah shithi, chowkidar ha district bad ha block, accountant, District Coordinator, State Coordinator, System Analyst bad kiwei kiwei.
Kine ki nongtrei hapoh ka skhim Samagra Shiksha ki la ong ba ka jingpynkiew tulop ka long ha la kajong kajong ka kyrdan hapdeng T.5,000, T.8,000, bad T.12,000.
Tang ki Block Resource Person (BRP) bad Cluster Resource Person (CRP), ki don haduh 847 ngut bad haba kheiñlang lut baroh, ki nongtrei ki don 1,474 ngut.
Haba kylli shaphang kane ka jingpynbeit thymmai ban pynkiew tulop, na ka liang u Commissioner and Secretary ka tnat pule puthi u Vijay Mantri u la ong ba ka jingpynkiew tulop kaba dei kaba pynshong nongrim katkum ka kyrdan bad ki snem ba la trei namar kito kiba ïoh tulop kham hapoh ban ïa kaba ïoh bainong sngi la kyntiew ban ïoh ïa ka tulop kaba ïahap bad ka bainong sngi.
Halor ka jinglut namar ka jingpynkiew tulop ïa kine ki nongtrei hapoh ka skhim Samagra Shiksha, u la ong ba lada kheiñ ïa ka jinglut kaba mynta, ka kot sha T.33 klur shisnem, hynrei namar ka jingpynkiew tulop yn lut tam sa kumba T.9 klur. Kumta baroh ka jinglut kan long T.42 klur shisnem ban siew tulop ïa kine ki nongtrei hapoh ka skhim Samagra Shiksha.
Kum ban pynkynmaw, ki nongtrei hapoh ka skhim Samagra Shiksha ki la pynlong ka jingïakhih ban dawa pynkiew tulop noh ha kaba la don ruh ka jingdawa ban pynkiew da 80%.
Hynrei kane ka wanrah ka jingbym hun hapdeng ki nongtrei namar ki don kiba pynpaw ba ka rukom pynkiew tulop ka dei ban long kaba shongnia ym ban shu dawa lut kumjuh ïa baroh namar hap ban peit katkum ka jinglong ka kam bad ki snem ba la don ha ka kam.
Ka skhim Samagra Shiksha ka dei ka skhim jong ka Sorkar Pdeng ha kaba ka jingbei pisa ka long 90 na ka 100 da ka Sorkar Pdeng bad 10 na ka 100 da ka Sorkar Jylla. Ka Samagra Shiksha ka dei ka skhim na ka bynta ka pule puthi ha ki skul naduh ki klas barit haduh klas 12.
Ka Samagra Shiksha ka dei kaba tang kawei ka kyrteng na ka bynta ki lai tylli ki skhim kiba kynthup ïa ka Sarva Shiksha Abhiyan (SSA), Rashtriya Madhyamik Shiksha Abhiyan (RMSA) bad Teacher Education (TE).
