Shillong, Nailar 06
Ki shipai BSF jong ka Meghalaya Frontier ki la pynkhlaiñ bha ïa ka jingïaid pahara ha ki khappud bad ka Bangladesh ban pynthikna ym don ka jingrung ne prong tuh shapoh u pud u sam ka India da ki nong Bangla.
Kane ka jingpynjur bad pynkhlaiñ jong ka BSF ïa ka jingpahara ha ki khappud ka dei namar jong ka jingïai bteng jong ka jingïakhih bad jingkynad ha Bangladesh.
Nalor ka jingpeitngor ïa ka rung ka mih, ki BSF ki la pynjur ruh ïa ka jingkhynra ha khappud ban khanglad ïa ka kam khaïi beaiñ bad kiwei kiwei ki kam bymman.
U IG BSF Meghalaya Frontier, Sh Harbax Singh Dhillon u la ong ba ki shipai bad ki field commander ki la tip bha ïa kaei kaba jia bad ki la pynjur bha ïa ka jingpeitngor.
“Ka jinglong-jingman sha shiliang u pud ka dei kaba la peit pyrman bha khnang ban lah tehlakam ïa kino-kino ki jingjia ki bym lah ban tip lypa. Ki heh ophisar bad ki Commandant ki la don mynta sha ki jaka khappud bad la bthah ba kin pynlong khlem sangeh ïa ka jingkhynra,” la ong u IG BSF.
Baroh ki Land Custom Station bad ki Integrated Check Post ha ki jaka khappud ka Meghalaya ki la don hapdeng ka jingpynkhlaiñ bha ïa ka bor pahara nalor ka jingpyrkhing ruh ïa ka ïaid ka ïeng jong ki ‘riew paidbah hajan khappud.
