Shillong, Nailar 06
U Myntri ka tnat jngohkai ka Jylla u Bah Paul Lyngdoh u la pynksan ïa ka sienjam kaba la shim da ka Dorbar Shnong Mawsynram ban ithuh ïa ka jaka ba don u Mawjymbuiñ tang kum ka jaka jngohkai ym kum ka jaka mane ne jaka lehniam jong kano-kano ka kynhun.
“Ka dei ka jingshisha ba ka jaka kaba don u Mawjymbuiñ ka dei kawei na ki jaka kaba khring bha ïa ki nongjngohkai. Kan ktah shibun lada shah ba kan long tang kum ka jaka lehniam jong kano-kano kynhun niam kyrpang namar ka dei ka jaka jngohkai kaba la ju wan na kylleng bad kita kiba wan ki don ha la kajong kajong ka niam bad ka jingngeit,” la pynpaw u Bah Paul.
U la ong ba ka India kum ka ri kaba don ki jait niam bapher-bapher, kan nym lah ban shim ïa kum kata ka jingmut ba kan dei ka jaka mane jong kano-kano ka kynhun.
“Na kata ka daw nga sngew ba ka sienjam jong ka Dorbar Shnong Mawsynram ka long kaba dei bad kaba shongnia,” la ong une u Myntri.
U la ong ba haduh mynta kam pat don kano-kano ka jingthoh na ka Dorbar Shnong ba kan ong ïa ka Sorkar ban tuklar lang, hynrei ynda la ïoh kum kata yn sa shim ïa ka rai.
Kane ka jingpynpaw u Bah Paul ka dei ruh shibynta hadien ba ka la mih ka jingpyrshah ban leh jubor bad pynkylla jaka mane ha krem ba don u Mawjymbuiñ.
