Tura, Nailar:
U Deputy Commissioner ka West Garo Hills (WGH), u Jagdish Chelani lyngba ka hukum ba la pynmih ha ka Sngi U Blei u la pyrkhing ïa ka ïaid ka ïeng jong ki kali heh kiba pyndonkam ïa ka surok Rajabala – Balachanda – Selsella – Garobadha.
Ka hukum ka la wan hadien ka jingpyrkhing haba ïadei bad ka ïaid ka ïeng jong ki kali heh, ïa kaba la pynsangeh ha surok AMPT – kiba ïaid lynti ban pynkit ïa u maw na Bhutan sha Bangladesh, hadien ba ka jingkieng (weak bridge) ha katei ka lynti ka la don hapdeng ka jingtor bad sa ban khyllem noh.
Ka lynti na Rajabala – Selsella – Garobadha ka la don lypa ha ka jinglong ba isangsot, ha kawei ka liang kaba la buh jingeh shi kat dei ïa ki kali ban ïaid wat hapdeng ka jingbiang ka suiñ bneng. Ka ïaid ka ïeng jong kine ki kali ka la nang buh jingeh shuh-shuh haba phai sha ka jinglong-jingman jong kito kiba pyndonkam ïa ka lynti na bynta ka leit ka wan kaba man ka sngi.
Ka hukum thymmai, ka la bujli noh ïa kaba kham ha shuwa ba la pynmih ha ka 29 tarik Naitung, kaba pyrkhing ïa ka ïaid ka ïeng jong ki kali ha surok AMPT.
Ka hukum thymmai ka kdew ba la pyrkhing ïa baroh ki kali heh ban ïaid lyngba ka surok Rajabala – Selsella – Garobadha.
Shuh shuh ka hukum ka la bynrap ba baroh ki kali kiba kit mar hapoh12 MT, yn shah ban jam sha shiliang jong ka jingkieng dewbilat kaba la sniew hajan Konachar ha ka surok AMPT. Ka hukum ka la ong ruh ba baroh ki kali kiba kit palat ïa ka 12 MT ki donkam ban pynhap ïa ka mar (ba kit tam) ynda la poi ha katei ka jingkieng ba sniew, ïaid lyngba, bad sa pynkit pat ïa ka mar hadien.
U DC u la bthah ïa baroh ki bor ba dei khmih ban pyntikna ïa ka jingbud ryntih ïa ka hukum bad kyrpad ruh ban pynbna ïa ka jingtip sha ki paidbah halor ka jingphiah lynti.
