Jowai, Nailar:
U Symbud Myntri Rangbah ka jylla, Bah Sniawbhalang Dhar uba dei ruh u MLA ka thaiñ u la kular ban ai jingïarap T.5 lak ïa ka skul Khanduli Secondary School (SS).
Ïa kane ka jingkular u Bah Sniawbhalang Dhar u la pynbna haba hiar sha ka shnong Khanduli ha ka 3 tarik Nailar ban ïakynduh kyrpang ïa ki nongïalam shnong halor kiba bun ki jingeh ba ka shnong ka ïakynduh naduh ka shongsuk-shongsaiñ, ka roi ka par bad kiwei de ki jingeh.
Ïa ka jingïalang ba lyngkot la pynïaid da u Bah K Bina, Asst Waheh Shnong Khanduli, jingkren pdiang burom na u Tbn KS Langshiang, ka jingkren maitphang na u Bah Yoshida Nongspung Waheh Shnong Khanduli.
Ki nongïalam shnong ki la pynsngew ïa ki jingeh ba ka skul ka ïakynduh, naduh ki building, lynti ïaid kjat bad khamtam ka tulop jong ki nonghikai bad la pynsngew ruh ha u Symbud Myntri Rangbah ïa ka jingsiew tulop ïa ki nonghikai kaba la kot shaduh ka T.4,44,000 ha ka shisnem.
U Bah Sniawbhalang u la ai khublei kyrpang ïa ki ‘riew rangbah jong ka shnong Khanduli ïa ka jingïohi jngai jong ki ban seng ïa kane ka shlem ai jinghikai hapoh ka shnong ka thaw ka ban long ka jingmyntoi pateng la pateng ïa ka shnong ka thaw.
U la kyntu ïa baroh ki nongshong shnong ba ki dei ban kam trai ïa kane ka skul bad ba ki dei ban kyrshan lang ïa ki nongïalam bad nongpynïaid jong ka skul. Ha kajuh ka por u la kyntu ïa ki khynnah skul ban trei shitom bad ba kim dei ban khmih lynti ban pyndep ïa ki jingpule tang kat ban ïoh kam sorkar hynrei ban pyntbit ruh ïalade ha ki kam ba ki kwah ban trei namar don bun ki lad ki lynti ban trei ban ktah ynda ki la don ka jingnang jingstad ba biang.
Kiwei ki rangbah kiba ai jingkren ki kynthup ïa u Bah C Daw, Dolloi Elaka Nogjngi, Bah Lieh Sungoh na Mynsngat, Bah Mutshwa Thabah Waheh shnong Sohphoh bad la pynphuh-pynphieng ïa ka jingïalang da ki jingshad bad jingrwai na ki khynnah skul ka Khanduli Secondary School.
