Mawkyrwat, Nailar 07
Ar ngut ki rangbah na ka shnong Nongprut bad Langkyna ha West Khasi Hills District ki bym kwah ban pynpaw kyrteng, ha ka 6 tarik u Nailar 2024 ki la ujor da ka ejahar ïa ka All Khasi Hills Achik Federation (AKHAF) ha thanat Nonghyllam, South West Khasi Hills District.
Katkum ka ejahar, kitei ar ngut ki rangbah ki la ïathuh ba ha ka 4 tarik u Nailar 2024 ha ka por kumba 2 baje eiei mynstep katba ki dang wan buh briew na Bakli bad ynda ki la poi ha Lad Bakli kyndit-kynsan kawei ka kali kaba don ïa u Nombor ML12-3708 ka la beh nadien bad ka la pynsangeh ïa ki.
Ki la ïathuh ruh ba na katei ka kali la mih 5 ngut ki briew kiba kam ïalade ba ki dei na ka seng All Khasi Hills Achik Federation ba la ïalam da u Vikesh D Marak na ka shnong Bakli, Khonjoy bad ki la dawa pisa na ki. Hynrei namar kim don pisa, kitei ar ngut ki la ïathuh ba ki la shah shoh bad shah rahbor sha khlaw ha ryngkat ka jingshah byrngem byrsit. Dei haduh ban da shai ka bneng ba kitei ki runar ki la pyllait noh ïa ki ryngkat ka jingbyrngem ba lada ki lap biang ba ki wan sha katei ka jaka kin thang bad kali bad briew.
Ha kaba ïadei bad katei ka jingjia, ka KSU Ranikor Cirlce ka la pynpaw ïa ka jingsngewkhia kaba jur halor ka jingshah shoh ki paradoh parasnam ha kaba kam don shuh ka shong suk shong shngaiñ ha ka jaka lajong.
U samla Marconi Thongni, President KSU Ranikor Circle haba kren sha ki lad pathai khubor u la pynrem jur ïa ka jingleh riewkhlaw jong kitei ki briew bad u la kyntu ruh ïa ki bor jong ka aiñ ba kin leh eiei namar katei ka seng la ar snem mynta ka la buh ïa ka khyrdop lum pisa ha Lad Bakli ha kaba ka la lum pisa na ki Khasi bad wat ïa ki Garo ruh.
Shuh shuh u samla Marconi u la ong ruh ba ka seng ka la dep ban ujor ha ki bor jong ka aiñ ba ki dei ban weng noh mardor ïa katei ka khyrdop jong ka seng AKHAF bad dawa ruh ban kem ïa kito ki briew kiba dawa pisa bad rahbor ha ka 4 tarik. Ka KSU ka kyntu ruh ïa ka AKHAF ba nangne shakhmat kim bit ban pyndik ne ktah kti ïa ki Khasi bad ban dang dawa pisa, bad lada kum kine ki jingjia ki dang ïai jia na ka liang ka seng kam banse ban mih shakhmat bad shim da kawei ka sienjam, la ong u samla Marconi.
