Shillong, Nailar 07
Ka kad khaïi hapdeng ka India bad Bangladesh kaba don ha Dawki bad kaba dei ruh kawei na ki kad khaïi kaba heh bad kaba la kham paw ka la kynjah hi jar namar ka jingumsnam ha Bangladesh bad bud sa ka kynrum- kynram saiñ pyrthei namar ka jingiehnoh kam ka Shiekh Hasina kum ka Myntri Rangbahduh ka Bangladesh kaba la phet syndon na la ri namar ka jingim jong ka, ka don ha ka jingma.
Haba U Nongsaiñ Hima u poi ha Integrated Check Post (ICP) ha Tamabil kaba don ruh ka jaka pahara jong ki shipai India bad Bangladesh, la sakhi ïa ki trok kit mar kiba la shu pynïeng, bad ka surok kaba don ki khyrdop ban rung sha Bangladesh la khang noh na baroh arliang ka India bad Bangladesh namar ki kam khaïi kim ïaid mynta shipor katba ym pat don ka jingshngaiñ.
Katkum ka jingïathuh kiba don ha kane ka kad khaïi ha Dawki ki la ong ba ki kam khaïi ki la shah ktah naduh ka sngi ba mih ka kynrum-kynram ha ka saiñ pyrthei ha Bangladesh kata ha ka 5 tarik mynta u Nailar, 2024.
Ka Dawki ka dei kawei na ki kad khaïi kaba heh bad lyngba kane ka kad khaïi, la ju shalan sha Bangladesh ïa ki maw bad kiwei-kiwei mar ki mata ym tang na Meghalaya hynrei ki mar khaïi kiba wan na kiwei ki ri marjan kum na Bhutan ban phah sha Bangladesh.
Ki nongkhaïi naduh kiba shalan maw bad kiwei-kiwei ki mar sha Bangladesh ki la shahktah kumba ka long mynta bad kim tip lano ka jingshong suk kan wanphai ha Bangladesh.
