Shillong, Nailar 07
Ka Meghalaya High Court ha ka Sngi Balang ka la ai hukum ban khot hajir ïa ka Deputy Commissioner bad u Superintendent of Police ka East Khasi Hills halor ka jingbym ai ïa ka syrnod ‘No Objection Certificate’ ban pynlong ïa ka jingïaid pilkrim ki ‘riewngeit Hindu sha krem Mawjymbuiñ.
Kane ka rai na ka ïingbishar ka la wan hadien ba kawei ka kynhun ba la tip kum ka ‘Yatra’ ka la ai da ka mukotduma pyrshah ïa ka sorkar jylla bad kiwei halor katei ka jingbymïoh ïa ka NOC.
Ka ‘Yatra’, kaba dei ka kynhun ba la pynrung kyrteng bad ka sorkar (Registered Society), bad ka la sngewmong hadien ba ym shym la ai NOC ban pynlong ïa ka jingïaid pikrim kaba shisien shisnem sha krem Mawjym-buiñ kaba don ha Mawsyn -ram. Kane ka kynhun ka la ong ruh ba ki Hindu ki kheiñ kyntang bha ïa kane ka krem.
U muktiar jong katei ka kynhun, u S Jindal, u la ong ba ka jingïaid (Yatra) ka dei kaba ju long shisien shisnem kaba la sdang naduh u snem 2011 bad da ka jingthaw ïa katei ka kynhun, ka jingpynlong ïa kane ka jingïaid pilkrim ka la kham long kaba beit.
Nalorkata, u Jindal u la pyni ïa ki jingai jingbit ba la ïoh naduh u snem 2011 haduh 2023 ba la ai da ki bor distrik ka East Khasi Hills. U la ong ruh ba ka Dorbar Shnong Mawsynram ha kine ki snem, kata, 2011 haduh 2023, ka la ai ïa ka NOC bad ka jingbit bad ki nongpynlong ïa ka jingïaid pilkrim ki la bud ryntih ïa ki jingbthah ba la tyngkhap lang ha ka por ba ai ïa ka NOC.
Shuh shuh utei u muktiar u la ong ba mynta u snem, ka jingai jingbit banyngkong la ïoh ha ka 27 tarik Jylliew, 2024 na ki bor distrik ha ryngkat ka kyndon ba ki nongpynlong ïa katei ka pilkrim kin hap ban ïoh ïa ka NOC na ka Dorbar Shnong Mawsynram. Hynrei haba ki nongpynlong ïa katei ka pilkrim ki la pyrshang ban ïakynduh ne ïakren bad ka Dorbar Shnong, ki khlem ïoh jubab eiei. Tangba ki la ïohi lyngba ki lad pathai khubor ba ka Dorbar Shnong ka la kyntait ban ai ïa ka NOC.
Ha kajuh ka por, u Jindal u la ong ba kam don satia kano-kano ka jingpyrshang ban thaw da ka jaka mane blei ha Mawjymbuiñ, bad ha baroh ki snem kiba la leit noh, ki ‘riewngeit Hindu ki ju synreit tang da ka um halor u Mawjymbuiñ. U la ong ruh ba kam don satia kano-kano ka jingthmu ban pynmong ïa ki jingsngew jongno-jongno lane ban wanrah ïa ka huri-hura ha katei ka jaka.
Na ka liang ka ïingbishar ka la rai ban khot hajir ïa ka Deputy Commissioner bad u Superintendent of Police ka East Khasi Hills ha ryngkat kiwei pat kiba la don kyrteng lang ha katei ka mukotduma ba la ai da ka Yatra.
Kine baroh kin hap ban wan mih hakhmat ka ïingbishar ha ka Sngi Palei, kata, ka 8 tarik Nailar ha ka por 2 baje mynsngi.
