Shillong, Nailar 07
U MLA ka BJP na South Shillong u Bah Sanbor Shullai u la khie bitar ïa ka jingleh dusmon ki briew ha Bangladesh kiba la leit ban pynjulor ïa u motdur jong u khlawait ka jaitbynriew u Tirot Sing Syiem ha Dhaka bad u la ong ba lada don kiba wan rung beaiñ shapoh u pud u sam ka India ban thombor, dei ban shu siat beit.
U Bah Sanbor u la pynpaw ka jingbitar bad ong ba dei ban siat beit ïa kiba rung beaiñ shapoh u pud u sam ka India namar ka jingpynjulor jong ki ‘riewdusmon ïa u motdur jong u Tirot Sing ha Bangladesh.
U Bah Sanbor uba la leit jngoh khnang ïa ki jaka ha khappud bad ka Bangladesh ha thaiñ Dawki bad Pyrdiwah ha ka Sngi Balang, u la ong ba kito kiba pynpra ïa u motdur jong u Tirot Sing ki dei kiba don ka mynsiem ksuid ha kaba ki la pynjulor ruh ïa u motdur jong u kpa ka Ri Bangladesh u Shiekh Mujibur Rahman uba la ïakhun ban ïoh laitluid ka ri Bangladesh.
Haba pynrem jur ïa ka jingpynpra ïa u motdur jong u Tirot Sing uba la dep ban tei bad plie dang tang ha ki khyndiat bnai mynta u snem 2024, u Bah Sanbor u la ong ba un sa pynsngew sha ka Sorkar Jylla bad sha u Myntri Rangbah ka Jylla ba dei ban tei biang da uwei u mot jong u Tirot Sing ha Bangladesh bad dei ban dei beit da u motdur uba shirynïeng kumba la dep mynjur mynba ma u, u dang long u Myntri ka tnat lariti ka Sorkar Jylla.
Haba pynrem ïa ka jingleh ‘riewkhlaw bad kren dom ïa ki briew kiba wan rung beaiñ sha India, u Bah Sanbor u la ong lada don kiba wan beaiñ, dei ban shu siat beit bad haba siat kan khie ka thma ha kaba ka Bangladesh ruh kan nym don jaka.
Une u MLA ka BJP ha ryngkat u Rangbah Shnong ka Pyrdiwah ki la pynkynmaw ruh ïa ka jingjia ha u snem 2001 ha Pyrdiwah ha kaba la don ka jingpyrshang ban kurup ïa ka shnong Pyrdiwah da ki shipai Bangladesh.
U Rangbah Shnong ka Pyrdiwah u Bah Ambrose Khonglah u la ong ba ka jingjia ha u snem 2001 ka dei kaba ki shipai Bangladesh ki la pyrshang ban kurup namar ba ym pat biang u pud u sam ha kaba u pud u la poi shadien jong ka shnong Pyrdiwah hynrei kham hadien la pynbeit noh ïa u pud shaba don ka wah kaba ki khot ka wah Pian ha Bangladesh bad mynta ka shnong Pyrdiwah ka don hapoh u pud u sam ka India.
U Bah Khonglah u la ong ba ka shnong ka don ka jingïatreilang kaba sngewthuh jingmut bad ki shipai BSF ban ïada ïa ki jaka kiba don hapoh India.
Na ka liang u Bah Sanbor haba pynkynmaw ïa ka jingjia shah thombor ki paradoh parasnam ha Pyrdiwah ha u snem 2001, u la ong ba ka jingwan khnang sha Pyrdiwah ka dei ka jingkynmaw ïa ka jingjia ha u snem 2001 bad lehse ka lah ban don ka jingshim kabu biang namar kane ka jinglong jingman ha Bangladesh bad donkam ïa ka jingïada bad long peitngor namar ym lah ban tip ïa ka shibit ne lashai bad donkam ban pynkhlaiñ ïa ka jingïada ym tang ki shipai BSF hynrei ka Sorkar Jylla bad ka Sorkar naduh Delhi.
U Bah Sanbor u la leit khnang sha ki jaka khappud ban sngewthuh bad ïohi hi ïa ka jinglong-jingman khamtam eh ka jingshngaiñ ki Khasi ha ki shnong khappud kum ha Pyrdiwah, Lyngkhat, Hat Thymmai bad kiwei kiwei khamtam ban ïakren bad ki shipai pahara BSF kiba ju don ha khappud India bad Bangladesh.
