Shillong, Nailar:
Ka Bharatiya Janata Party (BJP) Meghalaya ka la pynrem jur ïa ka jingleh jong ki shitniam Muslim ha Bangladesh ban pynpra dusmon ïa u mot sahnam jong u Tirot Sing Syiem uba la pynïeng ha phyllaw jong ka Indira Gandhi Cultural Centre ha Dhaka bad kumjuh ruh halor ka jingthombor ïa ki rit paid.
Une u mot Tirot Sing u dei uba dang shu pynïeng dang shen ha u bnai Rymphang mynta u snem ha katei ka Centre ha Dhaka. Hynrei, namar ka jingïakhih bad jingkynad kaba jur ha Bangladesh, une u mot u la shah pynpra noh bad katei ka Centre ruh ka la shah wiang ding.
Ha ka kyrwoh khubor ba la pyllait da u Nongaiktien ka BJP Meghalaya u Bah Mariahom Kharkrang u la ong, “Ka Jylla BJP ka la shimkhia bha ïa kane ka jingleh dusmon kaba ñiewbeiñ ïa ka jingkynmaw burom ïa une u ‘riewshlur bad ka jingsngew jong baroh ki jaidbynriew ka Jylla jong ngi bad ka Ri.”
Katkum ka jingong jong u “Ki dur kiba wan na Bangladesh ki la pynkyndit ïa kino-kino ki briew kiba la shai, ha kano-kano ka sla pyrthei. Ka jingpynpra ïa u mot Tirot Sing bad kumjuh ka jinghiar thma ïa ki rit paid bad ki jaka mane blei ha Bangladesh ka dei ka bym lah ban pdiang bad ka la pynsngewsih kthang ïa ngi. Ngi duwai ba ka bor jong ka jingsngewthuh kan ïeng rasong bad ka jingsuk kan wanphai noh mar-mar”.
Ka BJP Meghalaya ka la kyrpad ruh ïa ka Sorkar Pdeng ba kan ïakren ïa kane ka kam bad kino-kino kiba bat ïa u lakam jingsynshar ïa mynta ha kane ka Ri marjan khnang ban pynthikna ïa ka jingïada ïa kum kine ki jingtei sah kynmaw bad ban pynkut noh ïa ki kam umsnam pyrshah ïa ki rit paid ha Bangladesh.
