Shillong, Nailar:
Ka Shillong Municipal Board (SMB) ha ryngkat ka tnad ka koit ka khiah ha ka 6 tarik u Nailar 2024, ka la pynlong ïa ka ‘Enrolment Camp’ kaba jop ha ki ar sngi ban pynrung kyrteng ïa ki nongtrei kam pynlang jaboh hapoh ka Meghalaya Health Insurance Scheme (MHIS) bad ka Pradhan Mantri Jan Arogya Jana (PMJAY).
Kane ka Enrolment Camp kaba la pynlong ha Shillong Municipal Board Office Compound, bad ha Marten Waste Processing and Disposal Site, Mawlai, ka thmu ban ai jingïada na ka koit ka khiah ïa ki nongtrei kam pynïaid jaboh, ban pynthikna ïa ka jingbit jingbiang bad ka jingshngaiñ ha ka liang ka pisa tyngka jong ki.
Ha katei ka ‘camp’ ba ar sngi, la pynrung kyrteng ïa ki nongtrei kiba don baroh 330 ngut.
Ha kane ka ‘Camp’ ba la pynlong ha ka phyllaw jong ka shlem treikam ka SMB, la pynrung kyrteng ïa ki nongtrei ha ka ABHA Card bad ban pynïasoh ïa ka MHIS da ka Adhaar Card haduh 212 ngut, katba ha Marten Mawlai la pynrung kyrteng ïa 118 ngut. Ki nongtrei kiba la pynrung kyrteng ki kynthup ïa ki nongpynjied ïa ki jaboh, ki nongdie ïa ki jaboh jabaiñ, ki nongñiah kali, ki nongtrei trok, bad ki nongtrei na ka jaka pynkhuid jaboh jabaiñ (CBMTC), ka jaka bret jaboh bad ka jaka pynkhuid jaboh jabaiñ (FSTP).
Lyngba kane ka camp kaba la pynlong, ka pynpaw ïa ka jingkular jong ka Sorkar Jylla ban ai ka jingshakri ha ka koit ka khiah kiba lah ban ïoh da uwei pa uwei u nongshong shnong.
Ha katei ka sngi, la don lang da ki nongtrei jong ka Shillong Municipal Board (SMB) bad ki ophisar na ka tnat ka koit ka khiah ban pynthikna ba la ai jingbthah kaba paka sha ki nongwan pynrung kyrteng ha kaba ïadei bad ka jingpyndonkam ïa ka skhim MHIS bad PMJAY. Ka Ayushman Bharat Yojana, kaba la tip ruh kum ka Pradhan Mantri Jan Arogya Yojana (PMJAY), ka dei ka skhim ai jingsumar kaba la sdang da ka sorkar India ha u snem 2018. Ka jingthmu ba kongsan jong ka, ka long ban ai ka jingsumar kaba pura haduh T. 5 lak na ka bynta kawei ka longïing ha ka shisien snem na ka bynta ka jingshah sumar ha ki jaka sumar ba ar bad ba lai sha kumba 55 klur ngut ki nongïoh jingmyntoi na palat 12 klur tylli ki longïing kiba duk bad kiba rit paid ha kylleng ka ri. Ka jingïarap jong ka skhim ka long ruh sha ki nongtrei ka koit ka khiah kiba don ha ka kyrdan ba shapoh – ki nongtrei ASHA bad Anganwadi.
Ha ka jylla Meghalaya, katkum ka jingkheiñ kyllum ïa kiba la pynrung kyrteng hapoh ka MHIS Phase V ka don kumba 72.11%, ha kaba la pynshisha baroh ki long 1,835,631 ngut bad baroh ki longïing kiba la pynshisha ki long 496,497 tylli.
