Kolkata, Nailar 07
Wat la ka jinglong-jingman namar ka saiñ pyrthei bad ka jingïakynad ka dang bteng ha Bangladesh, ka kynhun kaba don kumba 600 ngut eiei na katei ka ri ka la shah khang ban rung sha India ha khappud ne ‘Border Point’ kaba ha West Bengal ha ki shipai ka tnad Border Security Force – kaba la pynjur ïa ka jingpahara jong ka naduh ba ka Myntri Rangbahduh katei ka ri, ka Sheikh Hasina ka la mih noh na la ri ha ka Lah Sngi U Blei. Kiba bun ki dkhot jong kane ka kynhun kiba la pyrshang ban rung sha India ha ka Sngi Balang; ka janmiet ban shimti ka ‘Interim Government’ ha Bangladesh – ki la kyrpad ïa ka tnad shipai ban shah rung, da kaba kam ba ki sheptieng ïa la ka jingim.
Ki ophisar ki la ong ba katei ka kynhun ka la pyrshang jam sha shiliang khappud sha India lyngba ka shnong Dakshin Berubari, kaba ha Jalpaiguri District, West Bengal.
“Ki la kyrpad ïa ngi ban shah rung shapoh ka ri, da kaba ong ba ki sheptieng ïoh ki shah thombor bad ki syier na bynta ka jingim lade. La batai sha ki ba ym shah satia ïa ki ban rung ha kane ka rukom,” la ong u ophisar.
Katba katto-katne na katei ka kynhun ki la saphred noh, kiba bun ki dang ap sah ka ‘Border Point’ ha ka janmiet Sngi Balang, da ka jingkhmih lynti ba yn shah ïa ki ban jam sha shiliang. Uwei u nongshong shnong haba kren sha ka PTI u la ong ba ki briew ki la ïalum ha ka jaka ker sainar shiah ban kyrpad ban shah rung shapoh.
“Hynrei ngim lah leh eiei. Ki la ïathuh shaphang ki jingïashem ba shyrkhei jong ki,” la ong utei u nongshong shnong.
Ka jingïakynad ka la sdang ha Bangladesh naduh shuwa ka ilekshon ha ka 7 tarik u Kyllalyngkot, ïa kaba la jop kput da ka Awami League jong ka Sheikh Hasina, hynrei katei ka ilekshon la kynnoh ba kam long kaba khuid bad suba .
Ka jingïakhih ki samla pule ka la sdang ha u Jylliew hadien ha ka High Court ha Bangladesh ka la wanrah ïa ka bhah thung kam kaba 30% na bynta ki bahaïing hasem jong ki nongïakhun laitluid jong ka thma 1971.
Ïa katei ka bhah la pynduna noh da ka ïingbishar ba hakhliehduh ka ri, hynrei ka rukom khmih bniah jong ka Hasina ïa ka jinglong-jingman ka la pynbitar ïa ki samla pule. Ki jingïakhih ki la bteng ha kaba ki samla ki la dawa ïa ka jinghiar shuki jong ka Hasina bad ka jingtyngkhuh hapdeng ki nongïakhih bad ki pulit kaba la ïalam sha ka jingïap jong kumba 100 ngut bad bun ngut kiba la mynsaw ha kylleng ka ri ha ka Sngi U Blei.
Ka Lah Sngi U Blei ka la sakhi ïa ki lak ngut ki samla pule kiba la shlei ha surok kiba la leit tur sha ïingsah ka Myntri Rangbahduh, ha Ganabhaban, kaba la pynbor ïa ka Hasina ban ieh noh kam bad phet noh na ka ri.
U nongïoh khusnam Nobel Prize, u Muhammad Yunus ha ka Sngi Palei un bam smai kum u khlieh jong ka ‘Interim Government’, la ong u khliehduh ka tnad shipai ka Bangladesh, u Waker-Uz-Zaman.
