Shillong, Nailar:
U MP ka Voice of the People Party (VPP), Dr. Ricky A.J. Syngkon u la thoh sha u Myntri ka tnad kam jngoh kai pyrthei bad lariti ka Sorkar Pdeng, u Gajendra Singh Shekhawat ban kyrpad kyntiew kyrdan ïa ka Indian Institute of Tourism and Travel Management (IITM) Camp-Shillong sha ka shlem pule (Centre) ba pura.
“Ïa mynta, ka IITTM ka treikam na phyllaw jong ka Institute of Hotel Management (IHM) ha ryngkat tang uwei u nonghikai bad u MTS naduh ba sdang ïa ka. Kumta, ka tyrwa tang ïa ka jingpule ‘Tour Guide Training Programme’ ïa mynta,” la ong u Dr. Syngkon ha ka shithi sha u Myntri.
U la kdew ruh ba ka tnad kam jngoh kai pyrthei ka Sorkar Jylla ha ka shithi ha ka 30 tarik u Jylliew, 2023 ka la kynjoh ktien sha u Economic Adviser ka tnad kam jngoh kai pyrthei ka Sorkar Pdeng ba ka Sorkar Jylla ka la pynbiang ka jaka kaba 10 akar sha ka IITTM, Shillong ha Mawkhanu, Mawpdang, East Khasi Hills na bynta ban kyntiew kyrdan ïa ka.
“Hynrei ka tnad kam jngoh kai pyrthei ka Sorkar Pdeng kam pat shimti ïa katei ka jaka haduh mynta,” u la ong.
“Da kaba buh jingmut ïa ka jingmyntoi ha ka liang ki kam jngoh kai pyrthei hapoh ka Jylla bad ka thaiñ, ka don ka jingdonkam kaba kyrkieh ïa ki briew kiba la pyntbit ban pynïaid ïa ki kam ba ïadei bad ki kam jngoh kai pyrthei bad ka jingpynïeng ïa ka IITTM-Centre ha Shillong ha ryngkat ki jingdon-jingem kiba katkum ka juk mynta bad jingpule, kan ai jingmyntoi shi kat dei ïa ki samla naba kin ïoh pdiang ïa ki sap ki phong kiba biang eh bad ki tiar pyndonkam ba bha kumjuh ka jingshakri ha ka tnad kam jngoh kai pyrthei,” la ong u Dr. Syngkon.
Ha kajuh ka por, u la ong ba kane kan pynkup bor ruh ïa ki samla ban saiñdur ïa kam jong ki ba ïadei bad ki kam jngoh kai pyrthei katkum ka juk stad saïan bad ka rukom kaba neh – ha kawei ka liang, kan nang ai kam shuh-shuh bad pynduna ïa ka jingeh jong ka jingkyrduh kam kaba pyndkhoh ïa ka Jylla bad ka thaiñ baroh kawei.
“Kane ka jaka ka lah ban nang kiew shuh-shuh lada pynbiang ïa ki jingpule ba kyrpang bad prokram ai jinghikai ban ïoh ïa ki nongtrei ba tbit ha ka liang ka ‘Hospitality Management’, ‘Travel Operations’ bad ‘Tourism Marketing’,” u la ong.
Ka jingkyntiew kyrdan ïa ka IITTM kan ïarap ban pynwandur bad pyntreikam ïa ki ‘Marketing Campaign’ kiba seisoh ban khring ïa ki nongshang pyrthei napoh ka ri bad shabar ri kumjuh, ha kajuh ka por ban rah ïa ka nam jong ka Jylla bad ka Thaiñ Shatei Lam Mihngi kum ka jaka pdeng jong ki jaka jngoh kai pyrthei, la ong u MP.
U la ong ruh ba la buh jingkheiñ ba ki kam jngoh kai pyrthei hapoh ka Jylla ki lah ban pynmih T.12,000 klur ha ka liang ka khajna lyngba ka jingbuh jingkheiñ jong ka jingwan poi ki nongshang kai pyrthei kaba 20 lak hapoh u 2028.
Shuh shuh u la bynrap ba ka jingkyntiew kyrdan ïa kane ka Camp sha ka Centre ba pura ym tang ba kan pynurlong ïa ki jingdonkam bad jingangnud jong ki samla ka Jylla (hynrei jong ka Thaiñ Shatei Lam Mihngi baroh kawei) hynrei ka jingkyrshan lyngba ki ‘Capacity Building’ ka ban ïarap shi kat dei ïa ka Jylla ha ka jingkiew ha ka ïoh ka kot lyngba ki kam jngoh kai pyrthei kaba don shibun ki jingmyntoi.
“Ka IITTM Centre ba pura kan kyntiew ïa ki kam jngoh kai na bynta ki nongshong shnong, da kaba kynthup lang ïa ki ha ki kam bapher-bapher – ban pyntikna ba ki jingmyntoi ha ka ïoh ka kot ki poi sha ki shnong ki thaw,” u la ong.
Na ka liang utei u nongmihkhmat u la ong ruh ba ka jingseisoh ha ka liang ki kam jngoh kai pyrthei kan khring ïa ka jingkyrshan pisa ha ki projek bapher-bapher kum ki surok, kad liengsuiñ nalor kiwei-kiwei.
