Jowai, Nailar 07
U CEM jong ka Jaiñtia Hills Autonomous District Council (JHADC) Bah Thombor Shiwat u la wanrah ïa ka Jaiñtia Hills Autonomous District (Constitution of District Council) Amendment Bill 2024, ha ka Dorbar kyrpang kaba la long ha ka 7 tarik Nailar.
Kane ka dorbar kyrpang la khot pynlong da u Chairman ka JHADC u Dr. S Shangpung hadien ka jingïoh pdiang ïa ka shithi kyrpad kaba 2 tarik Nailar 2024, kaba la soi da palat ar na ka lai bynta jong ki dkhot ka District Council.
Ka JHAD (Constitution of District Council) Amendment Bill 2024 ka la tyrwa ban weng noh ïa ka Jowai Central Konstitwensi, kaba la mihkhmat mynta da u MDC ka TMC u Bah Andrew A Shullai bad baroh ki shnong kiba hap hapoh ka Jowai Central la pynïasoh lang sha ka Jowai North Konstitwensi.
Ïa ka Nongbah-Ialong Konstitwensi kaba la don lypa la pynkylla sha ka Nongbah-Mihmyntdu Konstitwensi da kaba weng noh ïa ka shnong Ialong bad pynrung ïa ka sha ka Jowai South Konstitwensi bad ha ka jaka jong ka shnong Ialong la pynrung ïa ka shnong Mihmyntdu.
Kane ka Amendment Bill, ka la pynbeit thymmai ïa ki jaka jong ka Mukhla-Wahïajer Konstitwensi kaba mynta sha ka Konstitwensi kaba thymmai Mukhla-Ummulong da kaba pynïasoh ïa ka Wahiajer sha kawei pat ka Konstitwensi kaba thymmai ka Nartiang-Wahiajer.
Katba ïa ka Moodymmai-Ummulong kaba mynta pat la pynkylla sha ka Moodymmai Nongkhroh Konstitwensi bad ïa ka Nartiang-Umladang la pynbeit thymmai kum ka Modop Umladang Konstitwensi.
Ka jingïatai ïa kane aiñ rew (bill) kan long ha ka 8 tarik Nailar bad ban mynjur ruh ïa ka hadien ka jingiatai.
