Dhaka, Nailar 11 (UNI)
Ka Myntri Rangbahduh barim ka Bangladesh, ka Sheikh Hasina, ka la kynnoh ïa ka Ri United States halor ka jingdonkti ban weng ïa ka na ka bor synshar hadien ba ka khlem treh ban aiti ïa ka jingsynshar jong ka Bangladesh ïa ka dewlynnong St. Martin.
“Nga la dei ban neh beit ha ka bor lada nga la aiti noh ïa ka jingdon bor halor ka dewlynnong Saint Martin, bad lada nga la ailad ïa ka America ba kan don bor ha ka Bay of Bengal,” la ong ka shithi ba la thoh da ka Hasina bad ïa kaba la ïoh da ka kotkhubor ‘The Economic Times’.
Ka dewlynnong Saint Martin ka dei ka dewlynnong kaba rit (ka jingheh tang 3 km²) kaba don ha ka bynta ba shatei lam mihngi jong ka Bay of Bengal, kumba 9 km shaphang shathie na ka tduh jong ka Cox’s Bazar-Teknaf Peninsula, bad kaba pynlong ïa ka bynta kaba shathie tam jong ka Bangladesh. Ka don kawei ka dewlynnong kaba rit kaba ïajan bad kaba la pynïakhlad ha ka por ba kiew um, kaba ki khot ka Chera Dwip. Ka jingjngai jong ka dewlynnong Saint Martin ka long kumba 8 kilometre shaphang sepngi na ka rud duriaw ba shatei lam sepngi jong ka Myanmar, ha ka shyntur jong ka wah Naf.
Ha ki khyndiat bnai ba la lah, ka Hasina ka la ong ba kan ym ai wai ïa katei ka dewlynnong, hynrei ka khlem batai bniah. Kham hadien, u nongaiktien ka sorkar United States, u Matthew Miller, u la ong ba ka US ka khlem pyntip eiei ba ka don jingthmu ban shimti ïa katei ka dewlynnong.
Shuh shuh ka Hasina ka la ong ba ka la hiar shuki khnang ba kan lait na ka jingïohi ïa ka jingleit ontep ïa kiba bun ngut ki briew, bad ka la kyntu ïa ki Ri South Asia ba kin kiar na ka jingshah pynshad shrieh ha ki ‘riew shit niam.
“Lada dei ba nga la shong sah ha la ka jong ka Ri, kin dang bun ki ban ïap, bad kin dang bun ki jingshah pynjulor. Nga la shim ïa ka rai kaba jwat bha ban mih noh na la ka jong ka Ri,” ka la thoh.
Ki jingïakhih bashyrkhei ki la khie ha kylleng ka Bangladesh bad ka la mih ka jingïakynad hapdeng ki nongïakhih ba la ïalam da ka Anti-Discrimination Student Movement bad ki bor sorkar ha ka Sngi U Blei jong ka taïew ba la lah ha kaba bun ngut ki la duh noh ïa la ka jingim.
Ha ka sngi kaba bud, ka Hasina ka la hiar shuki noh kum ka Myntri Rangbahduh bad ka la wan phet noh sha India, bad haduh kine ki sngi ka dang don ha kane ka Ri.
