Shillong, Nailar 11
Ka jingpyrkhing ka Sorkar Jylla ban nym shah ïaid katba mon ïa ki kali kiba kit jingkit kiba khia lyngba ka jingkieng dam ha Umïam ka la long ka sienjam kaba ki paidbah ki ai jingïaroh khnang ba kane ka jingkieng kan long kaba shngaiñ.
Kum ban pynkynmaw, ha ka 30 tarik Naitung, 2024, la plie ïa ka jingkieng dam ha Umïam ban ïaid kali na baroh arliang, ha kaba la shah shwa ban ïaid tang ki kali kiba kit jingkit khia tang hapoh 4 metric ton.
Hynrei ka tnat Transport ka la pynbeit thymmai ha ka 1 tarik Nailar, 2024, ka tnat Transport ka Sorkar Jylla ka la pynmih ïa ka jingpynbeit thymmai ha kaba ïadei bad ka rukom pyrkhing ïa ki kali kiba ïaid lyngba ka jingkieng dam ha Umïam ha kaba la shah tang ïa ki kali kiba don ka jingjrong 2.8 metre na surok sha tnum kali, bad ka jingkhia ka long tang hapoh 9 metric ton.
Katkum ka jingpynbna kaba la pynmih da u Sanjay Goyal uba dei u Commissioner & Secretary ka tnat Transport la ong ba kane ka jingpyrkhing ka long katkum ka Section 113 jong ka Motor Vehicles Act, 1998 bad ka kyndon 95 jong ka Central Motor Rules 1989 ha kaba ïadei bad ka jingplie ïa ka jingkieng dam ha Umïam ban ïaid ki kali ha ryngkat ka jingpyrkhing ïa ka jingkhia bad jingshngaiñ ban ïada ïa ka jingkieng na ka jingma.
Ki paidbah kiba leit jingleit man ka por bad ïaid lyngba kane ka jingkieng ki la ai ka jingïaroh ïa ka Sorkar Jylla kaba la shim ïa kane ka sienjam kaba ki ong ka dei kaba biang eh ban pyrkhing ïa ki kali kiba kit jingkit kiba khia.
Ki la ong ba ka jingshah ban ïaid tang ki kali hapoh 9 MT bad ki kali kiba ka jingjrong ka long 2.8 metre na surok sha tnum kali ka dei kaba biang tam namar kiba kit jingkit khia ruh kin dei tang ki kali pickup ki ban nym kit palat pud hi.
Ki la ong ruh ba ka jingpynïeng ïa ka kynja khyrdop ha baroh arliang ka jingkieng ka dei ka sienjam kaba ïahap shisha namar kiwei pat ki kali heh khamtam ki trok kiba ju kit jingkit khia kin nym ïoh lad ban ïaid.
Hynrei ki paidbah ki la kyntu ruh ïa ka Sorkar ban thawlad khnang ba ki bos kiba wan na kiwei ki Jylla kin ïoh ban wan sha Inter State Bus Terminus (ISBT) ha Mawlai khnang ba kane ka ISBT kan long kaba treikam kumba ju long baroh shikatta.
Ki nongleit jingleit ruh ki la ong ba ki bos kiba kamai na Shillong sha Silchar, Mizoram bad Tripura ki dei beit ban wan ïeng ha ISBT Mawlai namar lada ki wan phai na thaiñ Silchar ruh kin wan beit sha ISBT.
Hynrei ki ong ba kiwei kiwei ki bos kiba wan na Guwahati, Arunachal, Nagaland bad Manipur kiba hap beit ban ïeng ha Umïam namar kam long kaba suk ïa kine ki bos ban leit swait naduh na thaiñ Diengpasoh ban wan shaduh sha ISBT ha Mawlai Mawïong.
