Shillong, Nailar 11
U nongïalam seng saiñ pyrthei ba paw ha Bangladesh u Salahuddin Ahmed uba la ïoh ban sah ha Shillong la palat 9 snem, u la poi mynta ha nongbah Dhaka hadien ba u la leit phai noh na Meghalaya sha ri lajong ha Bangladesh.
U Ahmed baroh shi katta u dei uba la don beit ha Meghalaya hadien ba u la shahkem ha nongbah Shillong ha ka 11 tarik Jymmang, 2015 namar ka jingwan poi jong u sha Meghalaya (India) khlem ki kot ki sla, ha kaba u la kynnoh ba u la shah rahbor ha ki briew bym ithuh ha Bangladesh nangta kiba la pynpoi ïa u sha Shillong.
U Ahmed u la poi ha Bangladesh ha ka por 2.15 baje janmiet ei ei ha ka Sngi U Blei da ka liengsuiñ ha Kad Liengsuiñ Hazrat Shahjalal International Airport, Dhaka.
La sakhi ba la pdiang sngewbha ïa u da ki phew hajar ngut ki paidbah kiba dei ki nongkyrshan ka BNP.
U Ahmed u dei u MP barim jong ka Bangladesh Nationalist Party (BNP) uba mihkhmat ïa ka Cox’s Bazar-1 constituency naduh u snem 1996-2006. U la long teng kum u Myntri Sorkar ha ka por jong ka Sorkar BNP kaba ïalam da ka Khaleda Zia kum ka Myntri Rangbahduh ka Bangladesh.
U Ahmed u dei dkhot jong ka BNP Standing Committee bad kum uwei na ki nongïalam ka BNP uba la paw bha.
Kum ban pynkynmaw, u Ahmed u la don beit ha Shillong mynta la palat 9 snem hadien ba u la shahkem ha ka 11 tarik Jymmang, 2015 namar ka jingwan poi ruma sha India khlem ki kot ki sla. Hynrei une u nong Bangladesh u la kynnoh ba u la shah rahbor ha ka por ba u don ha Bangladesh ha ka 10 tarik Lber 2015, bad hadien 60 sngi ba u la jah rngai ha Bangladesh, u la poi pynban sha Shillong ha kaba la lap ïa u Ahmed ha thaiñ Golf Link ha ka 11 tarik Jymmang 2015 ha ka por 5.30 baje mynstep.
Ka jingpoi u Ahmed sha Shillong ha kato ka por ka la pynlyngngoh bad mih shibun ki jingkylli, mano ba rahbor ïa u? Kumno kita ki nongrah bor ki pynpoi ïa u sha Shillong?
Hynrei haduh mynta ïa kane ka jingkylli ym pat ïoh jubab satia, namar ki pulit ka Meghalaya ki la pynngat ïa u Ahmed ha ka kyndon jong ka aiñ Foreigners Act bad u la ïakhun mukotduma ha Ïingbishar halor ka jingkynnoh ba u wan rung beaiñ sha India.
Ha ka 26 tarik Risaw, 2018, ka ïingkashari ha Shillong ka la pynksan ïa u Ahmed bad u la lait na ki jingpynngat kyndon ba u wan rung beaiñ namar u la ïasaid ba u khlem wan rung beaiñ hi da u ma, hynrei ka dei ka jingshah rahbor ha ki runar bad um tip satia kumno bad mano ba pynpoi ïa u sha Shillong.
Shuh shuh, ha ka 28 tarik Rymphang 2023, ka Ïingbishar kaba kham halor ruh ka la pynksan ïa ka rai jong ka Ïingkashari bad ka la hukum ban pynphai noh ïa u Salahuddin Ahmed sha ka ri jong u ka Bangladesh.
