Shillong, Nailar 11
Ka Khun Hynñiewtrep National Awakening Movement (KHNAM) ka la kyntu ïa ka Sorkar Jylla ban phah jingthoh sha ka Sorkar India na bynta ban pynbun shuh ki shipai ïada ri ha ki jaka khappud hapdeng ka Meghalaya bad Bangladesh ban khang ïa ka jingwan rung be-aiñ jong ki nongshnong shnong (ka Bangladesh) shapoh ka Jylla.
U Working President ka KHNAM-CEC, Bah Thomas Passah ha ka kyrwoh khubor haba pynkynmaw ïa ka thma ha u snem 1971 jong ka Ri Bangladesh, u la ong ba da ki phew lak ngut ki nong Bangladesh ki la ïoh rung sha India bad ka Thaiñ Shatei Lam Mihngi, khamtam eh ka Meghalaya kaba la mad ïa ka jingbuhai shnong jong ki nongwei ha kaba la mih sa kata ka ‘R.R. Colony’ hapdeng jong ka sorbah naduh kito ki por.
“Ngim kwah ba ha kane ka kynti, baroh kawei ka Jylla kan kylla ‘R.R. Colony’. Na kata ka daw ka seng ka kyntu ïa ka Sorkar ban pyntikna ba kine kim dei ban ïoh lad ban rung sha ka Jylla jong ngi da lei-lei ruh,” la ong u Bah Passah.
Halor ki dur khih kiba saphriang bad kiba pyni ïa bun bah ki nong Bangladesh kiba thmu rung sha India, utei u nongïalam u la ong ba ka seng ka kwah ba ka Sorkar Jylla kan phah lang ïa ki pulit jong ka (Jylla) sha ki jaka khappud bad ka Bangladesh, na bynta ban pynbun pulit ha baroh ki thanat ha kitei ki thaiñ.
U la kyntu ruh ïa ka Sorkar Jylla ban phah jingthoh sha ka Sorkar India na bynta ban kyrpad pynbun ïa ki shipai ïada ri ha kitei ki jaka.
U la bynrap, “Lada kine ki briew ki ïoh ban rung sha ka Jylla jong ngi, ngi sngewthuh ba kan don ka jingma kaba khraw ïa ngi ki jaidbynriew rit paid.”
Kum ban shu kdew hangne, ha ka Lah Sngi U Blei jong ka taïew ba la dep, ka la don ka jingsaphriang jong kawei ka dur khih kaba pyni kumba ki briew na Bangladesh ki la wan tur sha khappud Tamabil, Dawki.
Kumjuh ka la don sa kawei ka dur khih kaba la saphriang bad pyni kumba ki briew na Bangladesh ki dang ïalum ha khappud ha ryngkat ki jingpynthaba jingshai lyngba ki ‘mobile phone’ jong ki.
Namar ka jinglong-jingman ha Bangladesh kaba la poi shaduh u pud ba ka Myntri Rangbahduh ka ri, ka Sheikh Hasina (kaba la ieh noh kam) ka hap ban wan phet sha India. Kumta ka Sorkar Jylla ruh ka la rai ban pynjari da ka korphiw ha shi lynter jong ki jaka khappud hapdeng ka Meghalaya bad Bangladesh bad ïa kane ka korphiw la pynjari 12 kynta hapoh 200 mitar na khappud.
Ka korphiw ha kine ki 200 mitar na khappud kan treikam naduh 6 baje janmiet haduh 6 baje mynstep man la ka sngi tad haduh ban da pynbna da kumwei pat.
