Nongpoh, Nailar 12
U Mahbubul Hoque, Chancellor jong ka skulbah USTM ha Ri Bhoi District, ha ka Lah Sngi U Blei u la pynpaw ïa ka jingsngewsih jur halor ka jingkynnoh bym shongnia jong u Myntri Rangbah ka Assam, u Himanta Biswa Sarma ba ka skulbah USTM ka dei ka daw jong ka jingshlei um ka sor Guwahati da kaba pyndonkam ruh wat ïa ka kyntien kaba ktah ïa ka jingsngew niam kaba u la ong kum kata ka ‘Flood Jihad’.
U Hoque u la pynpaw ïa kane haba ai jingïakren bad ki lad pathai khubor ka jylla ha kane ka sngi kiba la leit ban jurip bad wad jingtip kaba thikna ïa katei ka jingkynnoh jong u Myntri Rangbah ka Assam ka dei ne em kaba shisha bad kiei ki bynta ba u lah ban pynshai sha ki paidbah ka jylla bad ka thaiñ shatei lam-mihngi hi baroh kawei.
“Kane ka skulbah kaba don ha ka jaka kaba heh kumba 100 akar eiei, ka dei kaba jngai kumba 6 kilometer eiei na ka sor Guwahati. Naduh u snem 2011 ngi la sdang ban pynbha ïa kane ka skul bah bad dei ha u snem 2009 ba ngi la ïoh ban sdang ïa ka kolej Engineering. Ka long shisha kaba pynduh mynsiem ban ïohsngew ba ki la don kiba kynnoh ba ka jingshlei um ka dei na ka daw jong kane ka skulbah,” u la ong da kaba pyntip ruh ba ka jingtih khyndew ha kine ki thaiñ ka long shisha kaba la palat, hynrei ban kynnoh pat tang ïa ka USTM kam long satia kaba dei khlem da pynshisha lyngba ki jingtohkit kiba long katkum ka juk saïan.
U Mahbubul Hoque u la ong ruh ba ka skulbah ka la leh shibun ki kam kiba ïadei bad kumno ban ïada ïa ka mariang sawdong sawkun, ka jingpynlang ïa ki umslap, ka jingthung ïa ki dieng ki siej ban pynjyrngam biang ïa ka bad kaba don ruh ïa ki nala pyntuid um kiba paka bad ka dei ruh kaba la ithuh kum kata ka Green Campus lane ka jaka pule kaba jyrngam.
U la pyntip ruh ba ha kane ka skulbah, ki don haduh san tylli ki pung kiba heh kiba la pyntuid bad pynlang ïa ka umslap. Ki um kiba mih na kane ka skulbah bad tuid sha ki nala ruh ki dei ki um kiba la dep ban pynkhuid shwa. Shuh shuh u la ong ruh, wat ha ki jaka kiba dang tei thymmai, kum ïa ka PA Sangma International Medical College and Hospital ruh, ki don ki nala pyntuid um kiba biang kiba long katkum ka juk stad saian ha baroh ki jaka jong ka skulbah.
U la pynpaw ruh ïa ka jingsngew bynñiaw ba wat hapdeng katne ki jingpyrshang jong ka skulbah, hynrei ban shu kynnoh tang ïa ka USTM kam dei satia kaba dei, naba da ki hajar hectares ki jaka ba marjan bad ka sor Guwahati ki don, bad ha shwa ban kynnoh tang ïa ka USTM, dei ban da pynlong shwa ïa ki jingtohkit kiba bniah ban lap ïa ki jingshisha ym ban shu kren tang ban lait jynhaw ne wad daw shimet.
U Hoque u la pynpaw ruh ïa ka jingsngewkhia halor ka jingktah jong kine ki jingshah kynnoh pyrshah ïa ka skul bah da kaba pyntip ba ki don mynta haduh 6000 tam. Tang na Guwahati ki don palat 1000 tam kiba wan pule bad bun na ki nonghikai bad ki nongtrei ruh kiba dei na Guwahati. Kum kawei na ki skulbah kaba don ïa ka burom bad ka nam, kine ki jingkynnoh ki bym don nongrim, ki la pynsngewsih kthang ïa baroh hi kiba ïadon bynta bad ka USTM.
Shuh shuh, u la pynpaw ruh ba ka USTM ka long kaba kloi ban ïakren ïa kino-kino ki jingeh kiba ïadei bad imlang ka sahlang da kaba ïathuh ruh ba ka thong jong kane ka skulbah hi ka long ban pynlong kum ka jaka pule kaba ïa kot kyrdan bad kiwei pat ki skulbah ha ka pyrthei bad ruh ban pynbha ïa ka mariang sawdong sawkun.
Na ka liang ki nonghikai bad ki samla pule haba ïoh ban ïakren ha kane ka sngi, ki la pynpaw ba katei ka jingkynnoh u Myntri Rangbah ka Assam kam dei satia kaba don nongrim bad kaba shongnia, naba kane ka jaka pule ka dei kaba jyrngam bad kaba don ïa ka jingjyrngam bad ruh kaba don ïa ka rukom treikam kaba sngewtynnad ïa ki nongtrei bad ki samla pule ruh kumjuh. Ki nonghikai bad ki samla pule ki la pynpaw ruh ba kane ka jaka pule ka dei kaba sngewtynnad bad na liang u Chancellor u da shimkhia haduh katta ban pynneh pynsah ïa ka mariang, ban thung ïa ki dieng ki siej bad ruh khamtam ban ai ïa ka jingpule kaba paka tam.
Kawei na ki samla pule na Assam, ka la kynnoh ba ka jingshlei um ha sor Guwahati, ka dei na ka jingbym biang ki nala um bad ka jingbym lah ki bor sorkar hi ban leh ïa kaba donkam, hynrei ban pynlait khlieh ïalade, ki kynnoh pynban sha ka skulbah USTM.
Kumba la sakhi ha kane ka sngi, la ïohi ba ka jingtih khyndew pathar ha ki thaiñ kiba don marjan bad kane ka skulbah, kam dei satia kaba dang thymmai, hynrei kaba la dep mih ruh ha ki lad pathai khubor naduh ki por kiba mynshwa, hynrei wat hadeng ki jingujor kiba bun, ym shym la ïohi pat ba ki bor pynïaid district kin leh eiei halor kane ka bynta.
