Shillong, Nailar 12
Saw ngut ki briew ki la shah kem ha ki pulit ka East Khasi Hills halor ka jingkynnoh ba ki la don bynta ban ïasuh-buit ban die tuh ïa ki nar rod kiba shongdor kumba T. 10 lak.
Ha ka banyngkong, ar ngut na kitei kiba la shah kem ki la leh mynleh kumba ki dei ki lanot jong ka jingshah tuh. Hynrei ynda la tohkit, la shem pynban ba ki la ïasylla lypa bad kiwei pat ban pyni ba kita ki nar rod ki la shah tuh.
Ha u kyrwoh khubor, u SP ka East Khasi Hills, u Bah Sylvester Nongtnger, ha ka Lah Sngi U Blei u la pyntip ba kitei ki saw ngut kiba la shah kem ki dei kiba la tip kyrteng kum u Deibormi Mukhim, 40 snem, u Robert Shadap, 25 snem, u Babiangbor Mylliem, 38 snem, bad u Shopstarwell Jana, 35 snem.
U SP u la pyntip ba ha ka 9 tarik Nailar, ki pulit ki la ïoh pdiang da ka jingthoh FIR na u Deibormi Mukhim bad u Robert Shadap ha kaba la kdew ba ha ka 8 tarik Nailar, katba ka trok jong ki kaba don ïa u nombor NL-01-K-6051 (12 shaka), kaba la kit ïa ki nar rod (TMT Bars), ka dang pynïeng ha surok Mawryngkneng by-pass, saw ngut ki briew ki bym lah ban ithuh bad kiba la rah da ka tari ki la rung shapoh ka trok ha ka por kumba 8:50 mynmiet. La kynnoh ruh ba kita ki saw ngut ki la tan jubor ïa ki (Deibormi bad Robert) sha kawei ka kali Alto 800 kali kaba khlem don satia ïa u nombor.
U SP u la ong ba la kam u Deibormi bad u Robert lem bad sa uwei pat u nongñiah jong kawei ka trok kaba don ïa u nombor ML-05-T-3858, ki la shah set baroh shi miet bad ki la shah pyllait ha ka step jong ka 9 tarik Nailar ha Pynursla.
“Haba la ïoh jingtip, la sdang ïa ka jingtohkit. Hynrei ha ka jingtohkit, la lap ba u Deibormi Mukhim bad u Robert Shadap ki la pynbeit lypa ban pynhap ïa ki mar ha Pommura, bad hadien kata, ki la thep ïa ki tiar ha kawei pat ka trok kaba don ïa u nombor ML-05-T-3858. Ïa ki mar ba la tuh la ïoh kurup na ka shnong Laitkyrhong bad na ka shnong Jongksha, bad baroh ki nar rod ba la ïoh kurup ki long kumba 18.5 ton kaba kot kumba 9.5 lane 10 lak tyngka,” la ong u Bah Nongtnger.
Shuh shuh ka trok kaba don ïa u nombor NL-01-K-6051 (12 shaka) ïa kaba la pyntip ba ka la jah, la lap na ka shnong Mukhla, West Jaiñtia Hills katba ïa ka trok kaba don ïa u nombor ML-05-T-3858 kaba la pyndonkam na ka bynta ban leh ïa katei ka kam runar la ïoh kurup na 7 Mer, Bañiuñ, Upper Shillong, la ong u SP.
Ha kaba ïadei bad katei ka jingjia, u SP u la ong ba ki pulit ki la dep ban pynrung da ka ejahar ha thanat Mawryngkneng hapoh ka kyndon 309 (4)/137 (2) jong ka BNS bad ki la kem noh ïa kitei ki saw ngut ki briew bad ka jingtohkit ïa kine ka la ïaid shakhmat.
