Shillong, Naiwieng 13
Ka Voice of the People Party (VPP) State Youth Wing, hapoh ka jingïalam u Dr. Jeremiah, ha ka 13 tarik u Naiwieng 2026, ka la leit ban ai ka jingkyrshan ïa ki longkmie ka Joint Action Committee (JAC) kiba dang bteng ban ïakhih ha u motdur u Kiang Nangbah.
Lah ban kdew ba kane ka jingïakhih ka JAC, ka dei halor ka jingdawa na ka Sorkar Jylla, ban pyndam noh ïa ka projek Ropeway ha Lum Shyllong bad rah sha kiwei ki jaka ba donkam.
Haba kren sha ki lad pathai khubor, u Dr.Jeremiah Kharshiing u la ong ba kane ka projek Ropeway kan ktah shisha ïa ka imlang ka sahlang.
U Dr. Jeremiah u la ong ba na ki kot ki sla kiba ki la ïohi, ba ki mut ban shna sa ïa ki jingtei hapoh ka Lower Terminal kaba 3 bad 4 mala bad ha Upper Terminal ruh kumjuh bad ki kwah ban shna sa ïa ki restaurant, ki Guest Room, ki Leisure Park, ki Food Court, ki parking bad ong ba sa katno kin pom ïa ki dieng na katei ka khlaw.
“Ka Sorkar ka ong ba ïa ka um na katei ka projek kan ktah tang 0.2, hynrei u la kylli naei ki ïoh jingtip ïa kata. 545 tylli ki dieng la dep ban pynkhyllem bad kata ka dei kaba la ïoh jingkheiñ. Lada pom ïa ki dieng ban shna ïa kine ki jingtei, ka um ha Lum Shyllong ka la kut syndon,” u la ong.
“Kynmaw ba lada kata ka um kan rngad noh, yn nym lah ban wanrah biang shisien ba ka la rngad. Lada kane ka projek kan ïait beit kan sa ktah kylla sha ki khun ki kti jong ngi ki pateng ban wan,” u la bynrap.
Kumta u la khot la wer ïa ki paidbah ban wan ai ka jingkyrshan ïa ka jingïakhih ki longkmie ka JAC, ban ong ‘Em te em’ ïa kane ka projek.
