Shillong, Naiwieng 13
U Symbud Myntri Rang-bah ka Jylla ka tnad District Council Affairs (DCA), Bah Prestone Tynsong u la ong ba ïa ka tarik ban pynlong ïa ka ilekshon sha ka Garo Hills Autonomous District Council (GHADC) yn sa shim rai bad pynbna tang hadien ba la pyndep ïa ka jingpynbeit ryntih ïa ki konstitwensi bad ïoh jingmynjur na u Lat ka Jylla.
U Bah Prestone u la ong ba u dang shu ïoh jingtip ba ïa ka kaiphod pynbeit konstitwensi ka long kaba la khreh bad mynta kan ïaid lyngba ka jingpyndep ïa ki kam katkum ka Riti Synshar ka Ri.
“Nga shu ïoh jingtip ba ka ‘Delimitation Report’ ka la biang bad la dep ban pynkhreh bad kane ka kaiphod hap ban aiti sha ka District Council,” la ong u Bah Prestone.
U la pynshai ba ynda la dep ban wanrah ïa ka kaiphod hakhmat ka Council, ka Executive Committee ka GHADC kan sa khmih bniah ïa ka bad wanrah ïa ka hapoh Ïingdorbar ban ïoh ïa ka jingmynjur.
“Shisien ba ka EC ka GHADC ka la khmih bniah lut ïa baroh, nangta ki hap ban wanrah sha ka Ïingdorbar ha kaba ka Ïingdorbar ka hap ban mynjur ïa ka,” u la ong.
Hadien ba ka Ïingdorbar ka la mynjur ïa ka kaiphod, yn sa phah sha ka Sorkar – ka ban phah pat (ïa ka kaiphod) sha u Lat na ka bynta ka jingmynjur.
U la ong ruh ba ïa ka tarik ilekshon yn sa rai tang hadien ba la dep lut ïa kine kiei-kiei baroh.
“Ynda la pyndep ïa kata, nangta yn sa pynbeit ïa ka tarik ban pynlong ilekshon,” u la bynrap.
