Shillong, Naiwieng 13
U President ka Congress Bah Vincent H Pala ha ka sngi Thohdieng u la ong, ka jingkyrshan u MP barim ka Rajya Sabha Dr. WR Kharlukhi kam dei tang ka jingkyrshan jong uwei u briew, hynrei ka wanrah lang ïa ka kynhun jong ki nongïalam sha ka Congress shwa ka ilekshon MP shiteng samoi.
Haba kylli halor ka rai u Dr. Kharlukhi ban kyrshan ïa u kum u kyrtong, u Bah Pala u la ong, ka jingwan rung jong u President barim ka State NPP kan nang aibor ïa ka Congress.
“Da ka jingkyrshan u Dr. Kharlukhi ngin nang lah ban pynkhlaiñ ïa ka party,” ong u Bah Pala haba kdew ïa ka jingïaid lynti u Dr. Kharlukhi ha ka kam saiñpyrthei, na ka jinglong nongïalam ki samla pule sha ka jingtrei shitrhem ha ka saiñpyrthei ha kine ki 30 snem ba la leit kynthup ki 18 snem bad ka NPP.
“U la don ka jingshemphang la palat 30 snem mynta ha ka saiñpyrthei bad 18 snem ha ka NPP bad u dei ruh u nongïalam ki samla pule,” ong u Bah Pala.
U Bah Pala u la ong, “U dei u briew uba ïatip bad uba la pyni ïa ka jingdon akor ha ka balang, u long ruh u nongïalam ha ki kynhun bapher-bapher bad kawei na ki bynta kiba kongsan ka long ba u don ïa ka dur kaba khuid ha ka saiñpyrthei”.
U Bah Pala u la ong ba ka Congress kan ai ïa u Dr.Kharlukhi ïa ka kyrdan kaba biang katkum ka jingsngewdei bad ka jinglong jong u kum u nongïalam.
Hynrei, katkum ka jingong jong u Bah Pala, ka jingmyntoi kaba kham khraw ïa ka party ka long ka jingwan ryngkat jong kiwei pat ki nongïalam kiba la bud ïa u Dr. Kharlukhi.
“Ym dei tang ma u marwei, hynrei haba u wan, bun ruh na ki nongïalam jong u ki la pynïasoh bad ngi,” u la ong bad bynrap ba u la sakhi ïa kane ym tang ha Jowai, hynrei wat ha Ri War bad ha kylleng ki thaiñ Khasi bad Jaiñtia Hills, ha kaba bun ki nongïalam ki la pynïasoh sha ka Congress.
