Shillong, Naiwieng 13
Ka Khasi Students’ Union (KSU) Bengaluru Unit ka la phah da ka jingthoh sha u Bah Sniawbhalang Dhar uba dei u Symbud Myntri rangbah ka Jylla ban pynkloi bad pyndep noh ïa ka jingtrei jong ka Meghalaya House ha Bengaluru khlem da pynslem shuh ryngkat bad ka jingdon jong ka ophis jingïadei jong ka Sorkar Meghalaya.
Kane ka jingphah jingthoh ka KSU Bengaluru Unit ha u Bah Sniawbhalang haba u wan kum u Kongsan ha ka Hynñiewtrep Cultural Meet 2026 ryngkat bad ka jingrakhe ïa ka jingdap 10 snem jong ka seng, ha St. Claret College Autonomous, Bengaluru kaba la long mynha ka 7 tarik mynta u bnai.
Ha kane ka sngi kyrpang, u Symbud Kongsan, u dei u Bah Lambokstarwell Marngar, President barim jong ka Khasi Students’ Union (KSU) Sengkmie, u Kongsan Kyrpang, Bah Iada Martin Marbaniang, IPS, DIGP (Administration), Bengaluru, Karnataka, bad kongsan kyrpang u samla Pynshaiborlang Rani, Assistant General Secretary jong ka KSU Sengkmie.
Ha kane ka shithi ka KSU Bengaluru Unit ka la kyrpad ban pynïoh ïa ka liengsuiñ kaba leit beit na Bengaluru sha Shillong bad na Shillong sha Bengaluru khang ban kham suk ïa ki nong Meghalaya bad ïa ki South Indian kiba leit jngohkai ha Meghalaya.
Ban pynbiang ïa ka jingïarap pisa bad ka rukom pynkit ïa ki metïap jong ki nong Meghalaya kiba khlad noh ha Bengaluru bad ha kiwei ki bynta jong ka Ri India, sha la ki shnong, hynrei bun kiba nym lah ban kit sha la shnong ki hap pyndap kam ha Karnataka.
Ban pynïoh ïa ka CM Connect Emergency Helpline kaba treikam 24 kynta, kaba don ruh ïa ka WhatsApp service, khnang ba ki nong Meghalaya kiba sah shabar Jylla kin lah ban ïoh jingïarap ha ki por ba donkam kyrkieh.
Ka KSU Bengaluru Unit ka kyrmen ba ka Sorkar Meghalaya kan shimkhia ïa kine ki mat bad ban leh ïa kaba donkam na ka bynta ka bha ka miat, ka jingshngaiñ bad ka jingmyntoi jong ki paid Meghalaya kiba sah ha Bengaluru bad ha kylleng ka South India.
Kane ka Hynñiewtrep Cultural Meet 2026 kam dei tang ka prokram ban pyni ïa ka kolshor bad ka riti dustur tynrai, hynrei ka long ruh ka rynsan ban pynkhlaiñ ïa ka jingïatylli, ka jingïadei bad ka jingïalong kawei hapdeng ki samla Khasi kiba sah shabar Jylla.
U Bah Sniawbhalang Dhar, u la ai ïa ki kyntien ai mynsiem bad jingïaroh ïa ka jingïatreilang jong ki samla Khasi shabar Jylla, da kaba pynshlur ïa ki ban long kiba trei shitom, kiba don ka jingkitkhlieh bad ban bteng ban kyntiew ïa la ka jaidbynriew.
Nalor ki jingkren na ki nongïalam, ka prokram ka la long kaba itynnad lyngba ki jingrwai bad ki jingshad tynrai bapher-bapher kiba la pyni da ki samla pule bad ki samla Khasi kiba sah ha Bengaluru. Ka KSU Mangalore Unit ruh ka la wan ban ïashim bynta bad ban ai ka jingkyrshan ïa kane ka prokram.
