Shillong, Naiwieng 13
U Bah Chandame Sungoh, nongshong shnong ka Khanduli kaba hap ha khappud ka Jylla Assam, ha ka 13 tarik Naiwieng, 2026, ha ryngkat kiwei pat ki nongshong shnong, u la wan ban ai ka jingkyrshan ba pura ïa ka Joint Action Committee (JAC), kaba dang bteng ban pynlong ïa ka jingïakhih hakhmat u Motdur ba shi rynïeng u Kiang Nangbah.
Haba kren sha ki lad pathai khubor, u Bah Chandame, u la ong ba ka jingïakhih ka JAC, ka long kaba shongnia bad kumta u ai ka jingkyrshan ba pura halor kane ka jingïakhih.
U Bah Chandame u la kynnoh ruh ba ka Sorkar ka pyrshang ban pyntreikam beit ïa kane ka projek Ropeway ha Lum Shyllong kaba 151 klur, ka dei namar ba kin lah ban ïoh bamsap kumba 10-20 klur ban thied briew na bynta ka ilekshon.
“Ngam don kano-kano ka jingpyrshah ïa ka roi ka par, da kaba kdew ba ka Sorkar ka dei ban leh ïa kaba dei ha ka jaka kaba dei bad ka por kaba biang. Kum ki nongshong shnong kiba la mad ïa ka jingduh ïa ka um namar ka roi ka par, ka long kaba sngewkhia,” u la ong.
“Em te em ïa kane ka projek Ropeway ha Lum Shyllong,” u la bynrap.
U la ong ruh ba lada ka Sorkar ka pynkynriah noh shawei ïa kane ka projek u sngewban ai ka jingïaroh bad ai ka jingkyrshan, hynrei ha u Lum Shyllong te ym long, namar ba baroh ki ïatip hi ba u long u Lum uba kyntang.
“Ka um ka khamkor ban ïa ka rew ngap bad ka donkam ka Oxygen ban ïa ka pisa. Ka um kam lah ban mih tang ha ki khlaw kiba don tang 10 ne 20 tynrai ki dieng hynrei ka donkam ban bun ki dieng ba ka um kan heh,” la ong u Bah Chandame.
“Ka Sorkar ka rah ïa ka projek ha Lum Shyllong kadei ka ‘Jingkwah’ ym ka ‘Jingdonkam’ bad sngewthuh ïa kata hapdeng ka ‘Jingkwah bad ‘Jingdonkam’. Bad ngi ïohi ba ka Sorkar ka thom da ka bor ban pyntreikam ïa kane ka projek bad lada ïoh ban pyntrei ïa kane ka projek, ka Sorkar kan ïoh ban thied briew ha ka ilekshon lyngba ka pisa ba 151 klur na kane ka projek,” la kynnoh u Bah Chandame.
