Shillong, Nailar 12
Ki briew ki bym lah ban tip ki dei kiei la kynnoh ba ki la rung jubor shapoh ka krem Mawjymbuiñ bad kaba pynkheiñ ruh ïa ka ‘Stay Order’ kaba la pynmih da ka ïingbishar Meghalaya High Court.
Katkum ka jinglap jong ki nongkhmih ïa kane ka krem, la ong ba ka khyrdop ban rung shapoh ka krem, ïa kaba la khang tala, la lap ba la don kiba la pynpait ïa ka, kaba la pynlong ïa kine ki briew ban rung shapoh ka krem.
Lah ban pynkynmaw ba ka mukotduma ban lehniam ha Krem Mawjymbuiñ mynta ka dang don hapdeng ka jingbishar jong ka ïingbishar, kaba la buh ban shong bishar biang ïa kane ka mukotduma ha ka 14 tarik u Nailar.
Kane ka kam pynpait tala bad lehniam hapoh ka krem, ka la paw ruh lyngba ki dur-khih ha ki rynsan social media, ki runar ki bym lah ban tip, ki la prong jubor shapoh jong kane ka krem bad pynpait ruh ïa ka tala ba la pyndait ïa ka khyrdop.
Ha kane ka dur-khih la lap ruh ba ki la don ruh ki tiar lehniam ba la buh ha sawdong jong u maw uba ki ‘riewngeit Hindu ki ngeit ba u dei u Shiv Linga nalor ki sharak ba la thang bad ka pisa ba la buh hajan jong une u maw.
