Shillong, Naitung 27
Ka Kynhun Myntri ka Jylla ha ka Lah Sngi U Blei ka la mynjur ïa shibun ki rai kiba kynthup ïa ka jingkyntiew kyrdan ïa ka New Shillong Township Development Agency sha ka ‘Authority’, ka jingbuh ïa ka tnad wad bniah ne ‘Research Wing’, bad ka jingwanrah jingkylla ha ka aiñ GST jong ka Jylla.
Haba kren sha ki lad pathai khubor hadien ka jingïalang ka Kynhun Myntri ba la pynïaid da u Myntri Rangbah ka Jylla, u Conrad K. Sangma, u Myntri Sorkar, u Marcuise N. Marak u la ong ba ka Kynhun Myntri ka la mynjur ban wanrah jingkylla ha ka New Township Develop-ment Agency Rules, 2012.
“Ïa kane ka tnad mynta la thaw thymmai kum ka ‘New Shillong Development Authority’. Hashuwa ka treikam kum ka ‘agency’. Da kane ka jingkylla, mynta kan treikam kum ka ‘Authority’,” la ong u Marak.
Ka Kynhun Myntri ka la mynjur ruh ban thaw ïa ka ‘Research Wing’ hapoh ka tnad Meghalaya Border Areas.
“La mynjur ïa ka ‘Research Wing’. Ka tnad mynta kan thaw ïa ki kyndon shakri kiba donkam bad sdang ruh ïa baroh ki kam kiba donkam ban leh,” la ong u Myntri.
Na ka bynta ka jingrakhe sngi laitluid jong u snem 2026, ka Kynhun Myntri ka la jied ïa ki ‘VIP’ ban shim ïa ka ‘Salute’ ha ki ‘Headquarter’ jong ki distrik ha kylleng ka Jylla.
“Ki ophisar kin sa ïakren bad ki Myntri ban pynbeit kano ka distrik kaba ki kwah ban leit jngoh na ka bynta ka jingrakhe ha ka 15 tarik u Nailar,” ong u Marak.
Sa ha kawei pat ka rai ba kongsan, ka Kynhun Myntri ka la mynjur ïa ka jingwanrah jingkylla ha ka aiñ ‘Meghalaya Goods and Services Tax’ lyngba ka ‘Ordinance’.
“Kane ka long katkum ki rai ba la shim da ka GST Council, ka Sorkar India. Ïa kano-kano ka rai ba la mynjur da ka GST Council, yn hap pdiang da ka Kynhun Myntri ka Jylla. Ngi la mynjur katkum ki kyndon jong ka GST Council,” u la bynrap.
