Shillong, Naitung 27
Ka North Eastern Hill University Students’ Union (NEHUSU) bad ka KSU NEHU Unit ha ka sngi Nyngkong kala pynpaw ïa ka jingsngew laitluid halor ka jingmih noh u Vice Chancellor Prof PS Shukla bad kila kyntu ïa ki bor pynïaid ban shimkhia ïa ki mat ba sahteng na ka jingpynïaid ïa ka skulbah bad ki mat ba ïadei bad ka pule puthi.
U General Secretary ka NEHUSU u Martin Warjri, haba ïakren bad ki nongthoh khubor u la ai khublei ïa ki kynhun baroh, Dorbar Shnong, ki kynhun jong ki samla pule bad ki kynhun jong ka imlang sahlang kiba la kyrshan ïa ki jingïakhih kaba kila pynlong naduh kaba sdang.
“Ngi ai khublei ïa baroh kiba la ïeng ryngkat lang bad ngi. Mynta ka sngi, ngi dap da ka jingsngewtynnad ban pynbna ba u Prof. Shukla ym don shuh ha ka NEHU campus. Ka skulbah mynta kala long kaba laitluid na kito kiba la kiar ban shim ïa ka jingkitkhlieh ïa ki jingeh kiba la mad da kane ka skulbah,” u la ong.
Une u nongïalam ki samla pule u la leit ban ïakynduh ïa u Acting Vice Chancellor Prof SK Barik bad aiti ïa ka dorkhas ban pynpaw ïa ki jingsngewkhia kiba la shu ieh kumto ha kine ki snem kiba la dep.
Ha ka jingïakren, u samla Martin u la ong, ba kila ïa pynleit jingmut ha kaba ïadei bad ka jinglong jingman bad ïa ka jingkitkhlieh jong ka skulbah. Kawei na ki mat kaba kongsan kaba la pynpaw ka dei halor ka jingthungkam ha ka kyrdan Registrar In-charge bad Finance Officer In-charge kaba la leh ha ka por jong u Prof Shukla.
Ka NEHUSU kala kynnoh ba ka rukom treikam kam shym la ïaid satia katkum ki kyndon jong ka NEHU Act bad Statutes bad kala kyntu ïa u Acting VC ban khmih bniah ïa kane ka mat bad ban shim ïa ki sienjam kiba dei.
U Prof Barik u la pynthikna ïa kane ka kynhun ba yn sa rah ïa katei ka mat ha ka jingïalang jong ka Executive Council ba kan ïoh bishar bniah.
Ka seng kala ban jur ruh ïa ka jingdonkam ban pynkhie im ïa ka Convocation jong ka skulbah ïa kaba ym shym la pynlong shuh mynta la 3 snem.
U samla Martin u la ong, ka long kaba kongsan ban pynthikna ba ki samla kin ïoh pdiang ïa ka Degree ha ka jingïalang bad ba ïa katei ka rukom leh dei ban bteng biang ha kine ki snem ban wan.
U Prof Barik u la pynpaw, ba yn sa shimkhia ban pynlong ïa ka Convocation hapoh jong u bnai Nohprah 2026.
Ka jingduna ki nonghikai bad ki nongtrei ka dei ruh ka mat kaba la pynpaw ha katei ka jingïakren.
Ka NEHUSU kala kdew ba katei ka jingduna kala pynmih ïa ka jingeh kaba khraw ïa ki nonghikai ha kaba uwei u nonghikai un hap ban peit ïa ki spah ngut ki samla pule bad wat ka rukom treikam treijam ruh kala shah ktah lut. U Acting VC u la pynthikna ba ki bor pynïaid kin sa khmih bniah ïa ka jingdonkam ïa ki nonghikai bad ki nongtrei.
Ki samla pule kila kyntu shuh shuh ïa ki bor kiba dei khmih ban pynthikna ba dei ban pynlong ha ka por kaba la buh ïa ka jingpdiang ïa ka admission ha une u snem uba mynta, namar ha ki snem kiba la dep kala don ka jingslem ha kaba ïadei bad kane ka bynta. Kila pynpaw ruh ïa ka jingthylli ki kam ha ki kyrdan kiba heh jong ka skulbah ha kine ki ar snem kiba la dep bad kila dawa ba dei ban shim mardor ïa ki sienjam ban pyndap ïa kitei ki kyrdan ban pynthikna ba ka rukom treikam kan long kaba ïaid beit ïaid ryntih.
U samla Martin u la ong, ba u Acting VC u long uba kloi ban ïakren na ka bynta ka bha ka miat jong ka skulbah bad u la ai ka jingkular ban shimkhia ïa ki jingeh kiba la pynsngew.
