Shillong, Naitung 27
U Chief Organiser ka Congress Meghalaya Bah Banphira Basaiaw-moit u la ong ka jinghiar shuki u Myntri ka tnad pule ka Sorkar India u Dharmendra Pradhan ka dei ka jingjop jong ki samla pule kiba la ïakhih ha Jantar Mantar.
U Bah Banphira uba la wan phai sha Shillong hadien ba u la leit ïashim bynta bad ai jingkyrshan ïa ka jingïakhih ki samla ha Delhi ha kine ki sngi ryngkat saw ngut ki para nongïalam Congress u la pynpaw ba kane ka dei ka jingjop jong ki samla.
“Ngi la pynkhreh ban sah kham bun sngi ban leit kyrshan ïa ki samla pule lada ki dang bteng ka jingïakhih ha Jantar Mantar hynrei ngi la hap ban wanphai noh namar ka jingdawa ka la urlong,” u la ong.
U la pynpaw ba ka jingleit jong ki sha Delhi ka long kaba jop hadien ba u Myntri ka Sorkar India uba peit ïa ka tnad pule puthi u Dharmendra Pradhan u la hiar shuki noh.
U la ïathuh ba ha ka 25 tarik mynta u bnai haba la ïoh khubor ba u Pradhan u la hiar shuki, ki samla pule ki la pynpra noh ïa ki pandal bad sdang ban leit phai noh sha ïing.
Shuh shuh u la pyntip ba watla ki pulit ki pyrkhing bha ban rung sha Jantar Mantar hynrei ki paidbah ki dang bun ba wan poi namar ki la shong shi jaka shi jaka ban ïa pynpaw ka jingpyrshah.
“Ngi la ïohi ba ka don ka jingïakulmar ki pulit bad ki paidbah ha Jantar Mantar ka dei namar ki pulit ki wan pyndik haba ki dang shong ha jaka ïakhih bad ki don ruh ki dkhot ka BJP kiba wan leh mynleh ïakhih hynrei ki wan pynkulmar,” u la ong.
U la ong ba watla u Pradhan u la hiar shuki hynrei dei ban pynkylla lut ïa ka jingtreikam namar ka jinglait tuh ka jingkylli eksam NEET ka dei ka jingdonkti bun ngut.
